Ish-ambasadori francez në SHBA kritikon Ursula von der Leyen: Po tejkalon kompetencat në politikën e jashtme

Gerard Araud, ish-ambasadori francez në Shtetet e Bashkuara, tha në një intervistë për Euronews se Ursula von der Leyen po tejkalon kompetencat e mandatit të saj duke u përfshirë në politikën e jashtme, duke ndjekur një qasje të ngjashme me atë gjermane. Ai vuri në dukje se nga negociatat për paqen në Ukrainë deri te situata e tensionuar me Iranin, von der Leyen ka rritur rolin e saj më shumë se sa e lejonin traktatet e Bashkimit Evropian.

Ursula von der Leyen ishte zyrtarja e parë e BE-së që bëri thirrje për një tranzicion politik në Iran, në përputhje me qëllimet e Shteteve të Bashkuara dhe Izraelit, të cilët kanë kërkuar ndryshimin e regjimit në Teheran dhe një qasje më pragmatike nga blloku evropian.

“Ajo po vepron jashtë kompetencës së saj”, tha Araud në programin “12 Minutes With” të Euronews, një ditë pas fjalës së saj në një konferencë të ambasadorëve të BE-së, ku deklaroi se rendi botëror i pas Luftës së Dytë Botërore ka mbaruar dhe nuk do të kthehet më. Araud theksoi se traktatet e BE-së nuk i japin von der Leyen kompetenca të veçanta në politikën e jashtme dhe e cilësoi sjelljen e saj “të habitshme”.

Komentet e von der Leyen krijuan polemika në Bruksel, pasi sugjeroi se BE-ja do të mbrojë gjithmonë sistemin e bazuar në rregulla, por nuk mund të supozojë se do të mbrojë Evropën nga sfidat e së ardhmes. Araud shtoi se pozicionimi i saj është problematik për imazhin e BE-së si bastion i rregullave ndërkombëtare dhe respektit për vlerat themelore.

Ish-ambasadori kritikoi gjithashtu mungesën e një strategjie të qartë nga SHBA dhe Izraeli në Iran, duke vënë në dyshim shpresat për një rezultat të shpejtë të konfliktit. Ai paralajmëroi se Izraeli nuk do të ndalet në objektivin e tij për të konsoliduar ndikimin në rajon, edhe nëse kjo nënkupton përshkallëzim ushtarak dhe konflikt më të gjerë.

Araud përfundoi se situata në Lindjen e Mesme është komplekse dhe se Irani mbetet pengesa kryesore për stabilitetin rajonal, duke theksuar se ndërhyrjet pa një plan të qartë mund të çojnë në pasoja të paparashikueshme.