Tentoi të vidhte dy makina, në pranga 58-vjeçari në Malësinë e Madhe, i gjendet edhe lëndë narkotike

Policia e Shkodrës këtë të enjte ka arrestuar në fshatin Vrakë, në Malësinë e Madhe, një 58-vjeçar, pasi tentoi të vidhte dy makina dhe dëmtoi njërën prej tyre.

Sipas njoftimit nga policia, gjatë arrestimit të shtetasit Mhill (Sokoli) Kashari, 58 vjeç, iu konstatuan edhe lëndë narkotike, të cilat u sekuestruan në cilësinë e provës materiale.

“Menjëherë pas marrjes së informacionit se në një subjekt për shitje pjesësh për automjete, në fshatin Vrakë, një shtetas kishte kryer disa paligjshmëri, shërbimet e Komisariatit të Policisë Malësi e Madhe organizuan punën për identifikimin dhe nxjerrjen përpara përgjegjësisë penale, të autorit.

Si rezultat, u vu në pranga shtetasi M.(S.) K., 58 vjeç, banues në fshatin Vrakë.

Ky shtetas dyshohet se ka tentuar të vjedhë 2 automjete, në një subjekt në këtë fshat.

Më pas, ai ka dëmtuar gomat e njërit prej tyre, dhe ka dëmtuar, duke ngjyrosur me spraj, fasadën e subjektit.

Në momentin e kapjes, 58-vjeçarit iu gjet me vete, një sasi lënde e dyshuar narkotike Cannabis Sativa”, thueht në njoftimin e policisë.

Materialet procedurale iu referuan Prokurorisë së Shkodrës, për veprime të mëtejshme.