SHBA lejon cisternat iraniane të naftës të kalojnë në Ngushticën e Hormuzit

Shtetet e Bashkuara të Amerikës po lejojnë cisternat iraniane të naftës të kalojnë përmes Ngushticës së Hormuzit për të ruajtur furnizimin global me naftë, deklaroi të hënën Sekretari amerikan i Thesarit, Scott Bessent.

“Iranianët tashmë kanë nisur të nxjerrin anijet e tyre dhe ne e kemi lejuar këtë për të furnizuar pjesën tjetër të botës,” tha ai për CNBC.

Bessent shtoi se disa cisterna që furnizojnë Indinë tashmë kanë kaluar përmes kësaj rruge detare, ndërsa besohet se edhe disa anije kineze po arrijnë të kalojnë.

Sipas tij, administrata amerikane pret që trafiku i cisternave në Ngushticën e Hormuzit të rritet edhe më shumë përpara se Marina e SHBA-së dhe forcat aleate të fillojnë operacionet për të shoqëruar anijet tregtare në këtë korridor detar strategjik.

Bessent gjithashtu parashikoi se çmimet e naftës do të bien “shumë më poshtë” se 80 dollarë për fuçi pasi të përfundojë lufta, megjithëse tha se nuk mund të përcaktojë se kur mund të ndodhë kjo.

Ngushtica e Hormuzit konsiderohet një nga rrugët më të rëndësishme të transportit të naftës në botë, përmes së cilës kalon një pjesë e madhe e furnizimit global me energji.