Vrasja e gazetarit sllovak, Gjykata e Lartë zhbën pafajësinë e porositësve, çështja kthehet për rishqyrtim

Gjykata e Lartë në Sllovaki ka anuluar të martën dënimin e Gjykatës së Posaçme penale në lidhje me porositësit e vrasjes së gazetarit Ian Kuçiak dhe së fejuarës së tij Martina Kusnirova, duke e kthyer çështjen mbrapsht për rishqyrtim.

Shtatorin e kaluar Gjykata e Posaçme shpalli biznesmenin Marian Koçner dhe ortaken e tij Alena Zsuzsova të pafajshëm për urdhërimin e vrasjes së reporterit 27-vjeçar në 2018-n për mungesë provash.

Verdikti shkaktoi zemërim në mbarë vendin, që priste një rezultat ndryshe duke parë peshën e provave të paraqitura lidhur me ngjarjen, që ndryshoi regjimin politik në vend dhe që kumbon ende në ditët e sotme.

I konsideruar si “tronditës”, vendimi i la familjarët e viktimave mes lotëve kur lanë me ngut sallën e gjyqit, pasi dëgjuan shfajësimet.

Prokurorët e apeluan vendimin, që shpallte fajtor vetëm të pandehurin e tretë, ish-anëtarin e forcave speciale Tomas Szabo, për pjesëmarrje në vrasje.

Szabo u dënua me 25 vjet në një burg të sigurisë së lartë. Ndërkohë, një person tjetër i konsideruar si i organizator i vrasjes me pagesë u dënua më 15 vjet burg.

Në shkrimet e tij gazetari Kuçiak denonconte lidhjet mes figurave të qeverisë dhe biznesit me krimin e organizuar.