Një orë pritje në doganë, për të hyrë apo dalë në Shqipëri nëpërmjet Greqisë

Prej rreth tre muajsh, udhëtarët që kalojnë kufirin mes Shqipërisë dhe Greqisë në pikën e kalimit të Kristallopigi, pranë Kapshticë, po përballen me pritje të gjata si në hyrje ashtu edhe në dalje nga territori shqiptar.

Sipas raportimeve nga terreni, shkak i këtyre vonesave është implementimi i një sistemi të ri identifikimi nga pala greke. Udhëtarët detyrohen të presin shpesh më shumë se një orë për shkak të radhëve të krijuara në të dyja anët e kufirit.

Autoritetet shqiptare kanë kërkuar nga homologët grekë aplikimin e procedurave të përshpejtuara, veçanërisht për shtetasit që janë të pajisur me dokumente greke. Megjithatë, kjo kërkesë nuk është reflektuar në praktikë, duke bërë që fluksi i lëvizjes të vijojë me ritme të ngadalta.

Burime jozyrtare nga policia kufitare në Drejtorinë e Korçë bëjnë me dije se një nga faktorët që ndikon në vonesat është edhe koha e nevojshme për përpunimin e çdo individi. Procedura në sportel mund të zgjasë deri në 10 minuta për person, pasi përveç kontrollit dhe vulosjes së dokumenteve kërkohet edhe fotografimi dhe marrja e shenjave të gishtërinjve.

Autoritetet nuk kanë dhënë ende një reagim zyrtar lidhur me masat konkrete për përmirësimin e situatës.