Përfshihet nga flakët një hotel luksoz në Paris, evakuohen mbi 400 persona! Plagosen tre anëtarë të stafit

Të paktën 400 persona janë evakuuar nga një hotel me pesë yje në Paris, pasi një zjarr i madh shpërtheu në kuzhinën e hotelit.

Sipas raportimeve të mediave vendase, turistët u detyruan të largohen me nxitim nga dhomat e tyre, ndërsa dy anëtarë të stafit u përpoqën të shuanin zjarrin që nisi në kuzhinën e hotelit të famshëm Palace Le Bristol. Sipas raportimeve, tre persona po trajtohen për lëndime.

Zjarrfikësit thanë se zjarri filloi rreth orës 11:20 të mëngjesit me kohën lokale të mërkurën.

Rreth 100 zjarrfikës ndodhen në vendngjarje, konfirmoi Brigada e Zjarrfikësve të Parisit.

Policia ka paralajmëruar banorët dhe turistët e Parisit që të shmangin zonën e rrugës Rue du Faubourg Saint-Honoré derisa zjarri të vihet nën kontroll.

Hoteli historik festoi 100-vjetorin vitin e kaluar, duke shënuar një shekull luksi, elegance dhe art francez që nga hapja e tij në vitin 1925.

Një zëdhënës i hotelit i tha gazetës Le Parisien se “gjithçka është nën kontroll”.

“Siguria e mysafirëve dhe punonjësve tanë është prioriteti ynë kryesor,” tha ai.