Rubio: Ka përçarje në udhëheqjen e Iranit…

Sekretari amerikan i Shtetit, Marco Rubio, deklaroi se Shtetet e Bashkuara janë duke zhvilluar negociata me palë brenda Iranit, por refuzoi të zbulojë identitetin e tyre, duke theksuar se publikimi i emrave mund t’i vinte ata në rrezik.

Në një intervistë Rubio u pyet lidhur me një deklaratë të Presidentit Donald Trump në rrjetet sociale, ku ai sugjeronte se SHBA-të po negociojnë me një “regjim të ri dhe më të arsyeshëm” në Iran. Megjithatë, Rubio shmangu dhënien e detajeve konkrete.

“Nuk do t’ju zbuloj se kush janë këta njerëz, sepse kjo mund t’i fuste në telashe me grupe të tjera brenda Iranit,” u shpreh ai gjatë intervistës.

Rubio theksoi se brenda Iranit ekzistojnë përçarje në udhëheqje, duke lënë të kuptohet se disa aktorë mund të jenë të gatshëm për ndryshime politike.

“Sipas zhvillimeve të fundit, ka njerëz në Iran që mund të jenë të gatshëm të lëvizin në një drejtim tjetër për vendin e tyre, dhe kjo do të ishte shumë pozitive,” tha ai.

Ai shtoi se negociatorët iranianë kanë shprehur qëndrime më të moderuara në bisedime private, ndonëse këto nuk reflektohen gjithmonë në deklaratat publike.

“Në fund të fundit, mbetet për t’u parë nëse këta persona kanë fuqinë për të sjellë rezultate konkrete. Kjo është diçka që do ta testojmë,” përfundoi Rubio, duke shprehur shpresën për përparim në negociata.