Këshilltarët sërish kundër Lelit, përplasje për sekretarin, kryebashkiaku i Vlorës refuzon mbledhjen

Një tjetër përplasje është shënuar në bashkinë e Vlorës mes kryetarit të bashkisë, Dritan Leli dhe këshilltarëve bashkiakë. Një shkresë e firmosur nga kryebashkiaku, ku cilësohej mosha e pensionit të sekretarit të këshillit bashkiak, Agron Gjipali, por nuk kërkohej lirimi i tij nga detyra, ka sjellë një mbledhje jashtë radhe, ku Leli ka refuzuar të marrë pjesë.

Këshilltarët e kanë interpretuar këtë shkresë si kërkesë për të liruar sekretarin Gjipali dhe për t’i hapur rrugë punësimeve të reja. Leli sërish ka refuzuar të marrë pjesë në këtë mbledhje dhe ka dhënë një sqarim online për opinionin publik.

“Dua të sqaroj opinionin publik se sekretari i Këshillit Bashkiak, edhe pse i emëruar nga Këshilli i Bashkisë nuk ka statusin e anëtarit të këshillit që zgjidhet nga populli. Funksionet e tij janë administrative dhe pozicioni nuk ka mandat kohor. Marrëdhëniet e sekretarit rregullohen nga legjislacioni i punës”, shprehet mes të tjerash kryebashkiaku i Vlorës.