Futbolli botëror në zi, ndahet nga jeta trajneri legjendar Mircea Luçesku

Trajneri rumun Mircea Luçesku është ndarë nga jeta sot, në moshën 80-vjeçare, në Spitalin Universitar të Urgjencës në Bukuresht.

Ish-trajneri i ekipit kombëtar rumun ishte shtruar në spital që prej 29 marsit, pasi u sëmur teksa ishte në grumbullim me përfaqësuesen e Rumanisë në kampin stërvitor të Mogosoaias. Ai kishte qenë në pankinë në ndeshjen e play-off-it të Botërorit ndaj Turqisë. Të dielën e kaluar, ai u transferua në repartin e terapisë intensive pas një infarkti akut të miokardit.

“Spitali i Urgjencës Universitare i Bukureshtit njofton se sot, të martën, 7 prill 2026, rreth orës 20:30 (ora lokale), z. Mircea Luçesku u shpall i vdekur”, thuhej në njoftimin e spitalit.

Mircea Luçesku ishte një nga trajnerët dhe lojtarët më të suksesshëm rumunë në futboll, si dhe i pari që kualifikoi ekipin kombëtar për një Kampionat Europian, në vitin 1984.

Ai ishte trajneri i tretë me më shumë trofe të fituar në karrierë, plot 35 të tillë, duke u renditur pas Aleks Ferguson dhe Pep Guardiola.