Në pranga prokurori i Sarandës, akuzohet për korrupsion ndaj funksionarëve të drejtësisë

Ditën e sotme është vënë në pranga prokurori i Sarandës, Sali Hasa, i akuzuar për korrupsion pasiv të gjyqtarëve, prokurorëve dhe funksionarëve të tjerë të drejtësisë.

Hetimet u kryen nga Prokuroria e Posaçme Kundër Korrupsionit dhe Krimit të Organizuar, në bashkëpunim me Policinë e Shtetit.

Autoritet bëjnë me dije se nga ky hetim janë grumbulluar prova të mjaftueshme të cilat krijuan dyshimin se bëhet fjalë për vepra penale të korrupsionit pasiv të prokurorëve, sipas nenit 319/ç të Kodit Penal.

Gjithashtu, në pranga janë vënë edhe katër persona të tjerë, dy prej të cilëve kanë lidhje me futbollin dhe akuzohen për paracaktim të rezultateve në garat sportive:

Napolon Hodaj, Oficeri i Policisë Gjyqësore në Prokurorinë e Sarandës, i dyshuar për kryerjen e veprës penale të “Ushtrim i ndikimit të paligjshëm ndaj personave që ushtrojnë funksione publike”.

Qerim Ruçi, arbitër i ndeshjeve të futbollit, si i dyshuar për kryerjen e veprës penale të “Paracaktimi i rezultateve në garat sportive”, kryer në bashkëpunim.

Bledar Hajredini, zyrtar i klubit sportiv SHS “Përmeti”, i dyshuar për kryerjen e veprës penale të “Paracaktimi i rezultateve në garat sportive”, kryer në bashkëpunim.

Julian Zera, i dyshuar për kryerjen e veprës penale të “Ushtrimi i ndikimit të paligjshëm ndaj personave që ushtrojnë funksione publike”, kryer në bashkëpunim.

Emiljano Mirani, i dyshuar për kryerjen e veprës penale të “Ushtrimi i ndikimit të paligjshëm ndaj personave që ushtrojnë funksione publike”, kryer në bashkëpunim.

Gjithashtu, janë sekuestruar materialet në zyrën e prokurorit Sali Hasa.

LEXONI GJITHASHTU:

Apeli i GJKKO-së lë sërish në qeli gjyqtaren e Krujës, Enkelejda Hoxha