Policia franceze ndalohet të kontrollojë pallatin e Macronit në hetimin e kontratave të Panteonit

Presidenca franceze refuzoi të martën të lejojë hetuesit të hyjnë në Pallatin Elysee si pjesë e një hetimi mbi kontratat që lidhen me ceremonitë përkujtimore, duke përmendur imunitetin që gëzon Presidenti francez Emmanuel Macron, shkruan Politico.

Hetuesve që u paraqitën para Pallatit Elize nuk iu dha leja për të hyrë, tha një zyrtar i presidencës franceze i cili foli në kushte anonimiteti për arsye protokolli.

“Hetuesve u është thënë se dokumentet që kanë të bëjnë me personelin e Pallatit Elize, të cilat nuk lidhen me detyrat zyrtare të presidentit dhe për këtë arsye mund të ofrohen, do të ofrohen me kërkesë”, tha një zyrtar i Pallatit Elize.

Sipas njoftimit të prokurorit financiar kombëtar Pascal Prache, kërkimi i pasuksesshëm u krye si pjesë e hetimit mbi kontratat për organizimin e ceremonive përkujtimore.

Punonjësit e presidencës u thanë hetuesve se nuk mund të kontrollonin Pallatin Elize sepse ambientet janë nën imunitet presidencial, sipas deklaratës.

Hetuesit po hetonin dyshimet për korrupsion, ushtrim ndikimi dhe konflikt interesi në lidhje me organizimin e ceremonive përkujtimore në Panteon në Paris, sipas prokurorëve.

Panteoni është një mauzole ku prehen eshtrat e figurave të mëdha franceze , dhe në vitet e fundit individë të shquar si këngëtarja franko-amerikane Josephine Baker janë përfshirë në të.
Sipas gazetës franceze Le Canard Enchaîné, e cila raportoi e para lajmin për tentativën e kontrollit në Pallatin Elize, hetuesit po hetonin pse firmës “Shortcut Events” iu dhanë vazhdimisht kontrata për të organizuar ceremoni në Panteon. Sipas gazetës, çdo ceremoni kushtoi dy milionë euro.

Hetuesit thuhet se po hetojnë lidhjet midis Shortcut Events dhe Center des monuments nationaux , institucionit francez që menaxhon trashëgiminë e gjerë historike të vendit.