Vrasja në Memaliaj, reagon policia: I plagosur edhe vëllai i autorit të dyshuar! 29-vjeçari në kërkim

Një ngjarje e rëndë është regjistruar mbrëmjen e kësaj të martë në Memaliaj ku humbi jetën një 30-vjeçar. Lidhur me ngjarjen, policia ka dalë me një reagim zyrtar e cila njofton se vrasja ka ndodhur rreth orës 20:50.

Mësohet se pas një konflikti 29-vjeçari Donald Nela ka hapur zjarr ndaj 30-vjeçarit, Endi Goxha. Fatkeqësisht Goxha nuk ka arritur t’iu mbijetojë plagëve të marra dhe ka ndërruar jetë rrugës për në spital.

I plagosur ka mbetur edhe vëllai i autorit, 25-vjeçari Darjo Nela. Ende nuk dihen rrethanat e plagosjes së 25-vjeçarit. Ai mësohet se është jashtë rrezikut për jetën. Autori pas ngjarjes ështe larguar me makinë ndërsa policia po punon për kapjen e tij.

“Memaliaj/Informacion paraprak. Rreth orës 20:50, në Memaliaj, dyshohet se pas një konflikti, shtetasi D. N., 29 vjeç, ka qëlluar me armë zjarri shtetasin E. G., 30 vjeç, i cili ka humbur jetën rrugës për në spital.

I plagosur, në rrethana ende të paqarta, ka mbetur edhe vëllai i autorit të dyshuar, shtetasi D. N., 25 vjeç, jashtë rrezikut për jetën. Autori i dyshuar, pas ngjarjes, është larguar me automjet. Shërbimet e Policisë janë vënë në ndjekje të tij.

Ndërkohë, është ngritur një grup i posaçëm hetimor, në drejtimin e Prokurorisë, për sqarimin e rrethanave dhe dokumentimin ligjor të ngjarjes”, njofton policia.