Lojërat Olimpike 2021, deri në 10 mijë spektatorë vendas do të lejohen në impiantet sportive

Deri në 10,000 tifozë japonezë do të lejohen në ambientet ku do të mbahen Lojërat Olimpike në Tokio, me gjithë paralajmërimet e autoriteteve shëndetësore për rrezikun e përhapjes së COVID-19. Spektatorët nga jashtë Japonisë tashmë janë ndaluar, por organizatorët thanë se tifozët vendas mund të marrin pjesë, duke mos kaluar 50% të kapacitetit të impianteve sportive.

Lojërat Olimpike do të nisin më 23 korrik, ndërsa Lojërat Paraolimpike, një muaj më pas, më 24 gusht.

Vendimi për të lejuar spektatorë vjen pavarësisht publikimit të një raporti javën e kaluar nga ekspertë japonezë të shëndetësisë, në të cilin thuhej se zhvillimi i lojërave pa spektatorë ishte opsioni “më pak i rrezikshëm” dhe më i këshillueshmi.

Ekziston frika se Lojërat Olimpike mund të rrisin numrin e infektimeve nga COVID-19 në Japoni. Për këtë arsye, javën e kaluar, kryeministri Yoshihide Suga nxiti publikun japonez t’i shihnin lojërat nga televizori, në vend që t’i ndjekin ato nga stadiumi.

Të dielën, pesë javë para fillimit të Lojërave Olimpike, u hoq gjendja e emergjencës në Tokio.

LEXONI GJITHASHTU:

Japonia këmbëngul t’i organizojë Lojërat Olimpike pavarësisht situatës me pandeminë

Lojërat Olimpike nën hijen e COVID-19, SHBA paralajmëron shtetasit që të mos udhëtojnë në Japoni

Japonia hap qendrat e vaksinimit masiv për të moshuarit përpara Lojërave Olimpike

Pfizer do dhurojë vaksina falas për sportistët e Lojërave Olimpike