Carney: Evropa mund të rivendosë një rend ndërkombëtar të bazuar në rregulla

Kryeministri kanadez Mark Carney tha sot në Samitin e Komunitetit Politik Evropian (EPC) në Jerevan se Evropa nuk duhet të pranojë “një botë më brutale dhe të mbyllur”, por se ajo mund të bëhet bazë për rivendosjen e një rendi ndërkombëtar të bazuar në rregulla, ndërsa udhëheqësit evropianë paralajmëruan për rritjen e tensioneve gjeopolitike, dobësimin e aleancave dhe nevojën për të forcuar shtyllën evropiane në NATO.

Carney foli si udhëheqësi i parë i një vendi jo-evropian që mori pjesë në takimin e Komunitetit Politik Evropian, i cili u hap në Jerevan, raporton “The Guardian”. Siç raportohet nga Armenpres, Carney theksoi se është e përshtatshme që Kanadaja është vendi i parë jo-evropian që i bashkohet këtij forumi sepse “më evropiani midis vendeve jo-evropiane” ndan gjithashtu histori, vlera dhe besim me Evropën.

“Ne nuk besojmë se jemi të dënuar të pranojmë një botë më të izoluar dhe brutale, dhe tubime si kjo tregojnë një mënyrë më të mirë”, theksoi Carney.

Ai vlerësoi se rendi ndërkombëtar mund të rivendoset, por “nga Evropa” dhe theksoi se Evropa tregon forcën e vlerave të saj në mbrojtjen e një sistemi të bazuar në rregulla, por edhe të fuqisë së saj politike dhe ekonomike.

“Bota po kalon nëpër përçarje në shumë nivele – integrimi po përdoret si armë dhe rregullat nuk i kufizojnë më hegjemonitë”, tha ai.