Shpërthim tritoli në Laç, dëmtohet qepeni i një biznesi

Një shpërthim me lëndë plasëse ka ndodhur në orët e para të mëngjesit të së dielës në qytetin e Laçit.

Sipas informacioneve të publikuara nga policia, ngjarja ka ndodhur rreth orës 03:30, ku pranë qepenit të derës së një dyqani në pronësi të shtetasit Ndue Gjinaj, i vendosur në katin e dytë të një kompleksi shërbimesh përballë Bashkisë së Kurbinit, ka shpërthyer një sasi lënde eksplozive.

Nga shpërthimi janë shkaktuar dëme materiale në fasadën e biznesit dhe në pjesë të jashtme të objektit, ndërsa fatmirësisht nuk ka pasur persona të lënduar. Në momentin e ngjarjes, aktiviteti ka qenë i mbyllur dhe në zonë nuk ka pasur lëvizje qytetarësh.

Menjëherë pas marrjes së njoftimit, në vendngjarje kanë shkuar shërbimet e Policisë dhe grupi hetimor, të cilët kanë nisur veprimet për sqarimin e rrethanave.

Nën drejtimin e Prokurorisë, po kryhen hetimet për dokumentimin ligjor të rastit, ndërsa grupi hetimor ka sekuestruar pamjet e kamerave të sigurisë të bizneseve pranë, me qëllim identifikimin e autorëve dhe zbardhjen e plotë të ngjarjes.

Deri më tani nuk dihen motivet e vendosjes së lëndës eksplozive, ndërsa policia po heton në disa pista.