Kreu i Gjykatës së Lartë mesazh me rastin e Ditës Kombëtare të Drejtësisë

Kryetari i Gjykatës së Lartë, Sokol Sadushi, ka publikuar një mesazh me rastin e Ditës Kombëtare të Drejtësisë, ku i ka përcjellë urimet më të mira të gjithë gjyqtarëve dhe profesionistëve të sistemit të drejtësisë.

Ai shkruan se kjo ditë nuk është thjesht një moment kujtese institucionale, por edhe një ftesë për reflektim mbi peshën që mbart drejtësia në një shoqëri demokratike dhe mbi përgjegjësinë që ka çdo gjyqtar në mbrojtjen e të drejtave, lirive dhe dinjitetit të njeriut.

“Në këtë ditë, shpreh mirënjohjen time për punën dhe përkushtimin e gjyqtarëve që, pavarësisht sfidave të përditshme, i shërbejnë drejtësisë me përgjegjësi dhe dinjitet. Le të mbetet kjo ditë një kujtesë se drejtësia nuk forcohet vetëm nga ligjet dhe institucionet, por edhe nga karakteri, integriteti dhe guximi moral i atyre që e ushtrojnë atë”, thotë ai.

Sipas Sadushit, drejtësia kërkon dije, integritet, paanshmëri, kurajë dhe gjyqtarë që vendosin me ndërgjegje profesionale, me respekt për ligjin dhe me vetëdijen se çdo vendim gjyqësor ndikon drejtpërdrejt në jetën e qytetarëve dhe në besimin publik ndaj shtetit të së drejtës.

Në mesazhin e tij, ai thekson se besimi i publikut nuk mund të kërkohet vetëm nga jashtë.

“Besimi duhet parë, së pari, nga vetja jonë: nga mënyra si punojmë, si arsyetojmë, si sillemi, si komunikojmë dhe si e përmbushim çdo ditë detyrën. Drejtësia fiton autoritet kur gjyqtari është i gatshëm të shohë me ndershmëri edhe përgjegjësinë e vet, të korrigjojë mangësitë, të shmangë formalizmin dhe të vendosë qytetarin në qendër të shërbimit gjyqësor. Besimi ndërtohet çdo ditë, përmes vendimeve të arsyetuara, sjelljes së paanshme, transparencës institucionale, respektit për qytetarin dhe gatishmërisë për të mbajtur përgjegjësi. Ky besim është një kapital i pazëvendësueshëm për drejtësinë dhe duhet merituar në çdo çështje, në çdo seancë dhe në çdo marrëdhënie të sistemit me qytetarin”, thuhet në mesazhin e Sadushit.