Plagoset polici në Kuçovë! Po shoqëronte 45-vjeçarin, ai i merr armën nga brezi dhe e qëllon

Një efektiv i Policisë së Shtetit ka mbetur i plagosur mbrëmjen e sotme gjatë shoqërimit të një personi të dyshuar për “Prishje të qetësisë publike”.

Sipas njoftimit zyrtar, rreth orës 19:00, shërbimet e Komisariatit të Policisë Kuçovë po transportonin shtetasin me iniciale Z. S., 45 vjeç, banues në Kuçovë, nga Komisariati i Policisë Fier drejt ambienteve të Komisariatit të Policisë Kuçovë.

Gjatë shoqërimit, 45-vjeçari është konfliktuar me punonjësin e Policisë, shtetasin A.T., 20 vjeç, dhe gjatë përplasjes i ka marrë armën e shërbimit, me të cilën e ka plagosur.

Menjëherë ka ndërhyrë patrulla e Policisë, e cila ka bërë neutralizimin e autorit dhe i ka rimarrë armën e shërbimit. Efektivi i plagosur është transportuar në spital për ndihmë mjekësore dhe ndodhet jashtë rrezikut për jetën.

Po ashtu, gjatë kontrollit fizik ndaj të dyshuarit, shërbimet e Policisë kanë gjetur të fshehur në trup një sasi lënde narkotike, e dyshuar kokainë.

Ndërkohë, grupi hetimor dhe Agjencia e Mbikëqyrjes Policore, nën drejtimin e Prokurorisë, po vijojnë hetimet për zbardhjen e plotë të rrethanave të ngjarjes, si dhe për verifikimin e procedurave të ndjekura gjatë shoqërimit të personit nga efektivët e Policisë.