Mes tensioneve me Ukrainën, Rusia zhvillon stërvitje të forcave të saj bërthamore

Rusia filloi të martën manovra masive të forcave të saj bërthamore, duke përfshirë edhe lançime praktike të raketave balistike dhe të lundrimit me kapacitet bërthamor, në stërvitjet që vijnë mes rritjes së sulmeve me dronë ukrainas.

Ministria e Mbrojtjes tha se stërvitja tre-ditore do të përfshijë 64,000 trupa, mbi 200 raketahedhës, më shumë se 140 avionë, 73 anije luftarake sipërfaqësore dhe 13 nëndetëse, përfshirë tetë të armatosura me raketa balistike ndërkontinentale me armë bërthamore.

Manovrat do të përqendrohen në “përgatitjen dhe përdorimin e forcave bërthamore nën kërcënimin e agresionit”, tha ministria.

Stërvitjet do të praktikojnë gjithashtu bashkëpunimin me Bjellorusinë, një fqinj dhe aleat që strehon armë bërthamore ruse. Arsenalet ruse në Bjellorusi përfshijnë sistemin e saj më të fundit të raketave Oreshnik me rreze të mesme veprimi, të aftë për të transportuar armë bërthamore .

Manovrat vijnë ndërsa Ukraina ka intensifikuar ndjeshëm sulmet me dronë kundër Rusisë, përfshirë një breshëri sulmesh fundjave në periferi të Moskës që vrau tre persona dhe dëmtoi disa ndërtesa dhe objekte industriale.

Presidenti rus Vladimir Putin i ka kujtuar vazhdimisht botës arsenalet bërthamore të Moskës, pasi dërgoi trupa në Ukrainë në shkurt të vitit 2022, në përpjekje për të penguar Perëndimin të rriste mbështetjen për Kievin.