Konflikt me sende të forta mes dy personash në Shëngjin, një i lënduar. Policia jep detajet

Një konflikt me sende të forta është regjistruar mes dy personash mbrëmjen e së enjtes në zonën e lodrave në Shëngjin. Si pasojë e përleshjes, ka mbetur i dëmtuar një person, i cili është transportuar menjëherë në Spitalin Rajonal të Lezhës ku ndodhet jashtë rrezikut për jetën.

Policia bën me dije se kanë bërë të mundur identifikimin dhe shoqërimin e autorit të dyshuar i identifikuar me inicialet A. Ll.

Autoritetet policore gjetën dhe sekuestruan në cilësinë e provës materiale një armë sportive zhurmuese, e cila dyshohet se mbahej nga autori i dyshuar gjatë ngjarjes.

 “Shëngjin/Informacion paraprak. Rreth orës 21:30, në zonën e lodrave, në Shëngjin, gjatë një konflikti me sende të forta mes dy shtetasve, ka mbetur i dëmtuar shtetasi M. P., i cili është transportuar në Spitalin Rajonal Lezhë dhe ndodhet jashtë rrezikut për jetën.

Menjëherë pas marrjes së njoftimit, shërbimet e Policisë kanë shkuar në vendngjarje, ku kanë bërë të mundur shoqërimin e autorit të dyshuar, shtetasit A. Ll. Gjatë veprimeve të para hetimore është gjetur dhe sekuestruar, në cilësinë e provës materiale, një armë sportive zhurmuese, e cila dyshohet se mbahej prej tij.

Grupi hetimor ndodhet në vendngjarje dhe, nën drejtimin e Prokurorisë, po kryen veprimet procedurale për sqarimin e plotë dhe dokumentimin ligjor të rrethanave të ngjarjes”, njofton policia.