Lëvizja e Kryemadhit me mandatin e Fierit, Ben Andoni: Moralisht e padrejtë, politika po i përdor të rinjtë si garniturë

Analisti Ben Andoni tha për Euronews Albania se gjasat që Komisioni i Venecias të marrë në shqyrtim kërkesën e Gjykatës Kushtetuese lidhur me ligjshmërinë e zgjedhjeve lokale të 30 qershorit 2019 janë të vogla.

Sipas z. Andoni, mund të ndodhë që Venecia të mos përgjigjet më pasi është përgjigjur një herë për të njëjtën temë, ndaj një interpretim i dytë për të njëjtën çështje do të ishte luks.

“Ky do të ishte edhe një mesazh për Gjykatën Kushtetuese, pasi po kalojnë dy vite nga zgjedhjet. Mund të ketë një reagim të vonuar ose mund të thonë se jemi shprehur një herë për këtë çështje. Venecia është krijuar për të dhënë asistencë teknike të vështirësisë shumë të lartë”, shpjegoi z. Andoni.

Ai komentoi edhe lëvizjen e kryetares së Lëvizjes Socialiste për Integrim, Monika Kryemadhi, e cila vendosi të zgjidhte mandatin e marrë në qarkun e Fierit dhe jo atë të Tiranës, duke lënë pa mandat Keidi Mehmetajn dhe duke i dhënë mandatin e deputetit Petrit Vasilit.

Sipas analistit, teknikisht kjo është një lëvizje shumë e rregullt nga LSI, pasi Vasili mban peshën kryesore në parti, por moralisht nuk është e rregullt, pasi LSI është një parti e investuar për të rinjtë.

“Të rinjtë po përdoren nga politika për të rregulluar ‘make up’-in e partive. Të rinjtë janë garniturë, ndaj e ardhmja e të rinjve është në formacione që ata vetë duhet t’i formojnë jo siç kanë gabuar deri më sot”, tha analisti.

Ai e cilësoi si të fashitur aksionin e opozitës me kreun e PD në krye, çka sipas tij ka bërë që kreu aktual i qeverisë të bëjë oponencë brenda partisë së vet.

“Basha duket i tejngopur me pushtetin personal që e ka bërë të mos njohë humbjet. Momenti i parë kur duhet të mbahet përgjegjësi për zgjedhjet kaloi duke lënë një shije të hidhur dhe tani përcjellja e përgjegjësisë në struktura, duke thënë na e vodhën ata, çka nuk penalizon asnjë. Kjo është shenjë e keqe për demokracinë”, tha z. Andoni.

LEXONI GJITHASHTU:

• Ligjshmëria e zgjedhjeve lokale, Kushtetuesja do t’i drejtohet Komisionit të Venecias
• Monika Kryemadhi zgjedh të marrë mandatin e fituar në Fier