Rubio: Marrëveshja me Iranin mund të marrë “edhe disa ditë”

Sekretari amerikan i Shtetit, Marco Rubio, ka deklaruar se një marrëveshje me Iranin ende po negociohet në Katar, pavarësisht sulmeve amerikane ndaj portit jugor iranian të Bandar Abbasit.

“Disa bisedime po zhvilloheshin sot në Katar, kështu që do të shohim nëse mund të bëjmë përparim,” u tha Rubio gazetarëve në Jaipur, gjatë një vizite zyrtare në Indi.

“Mendoj se ka shumë diskutime dhe shkëmbime mes palëve lidhur me formulimet specifike në dokumentin fillestar, ndaj kjo mund të zgjasë edhe disa ditë,” tha ai.

“Presidenti ka shprehur dëshirën e tij për ta arritur marrëveshjen. Ose do të arrijë një marrëveshje të mirë, ose nuk do të ketë fare marrëveshje,” shtoi ai.

Rubio tha gjithashtu se është e rëndësishme që Ngushtica e Hormuzit të mbetet e hapur, duke theksuar se kjo rrugë ujore “do të hapet, në një mënyrë ose në një tjetër”.