Gjashtë foshnje të porsalindura vdesin në spital, nis hetimi në Bangladesh

Gjashtë foshnja të porsalindura humbën jetën brenda pak orësh në repartin postoperativ të Spitalit të Kolegjit Mjekësor Ad-Din në qendër të Dakës duke nxitur autoritetet në Bangladesh të nisin një hetim mbi shkaqet e ngjarjes.

Sipas Drejtorisë së Përgjithshme të Shërbimeve Shëndetësore (DGHS), foshnjat, të moshës nga një deri në tre ditë, ndërruan jetë mes orës 06:00 dhe 09:00 të mëngjesit në repartin pas lindjes të spitalit, në zonën e Maghbazarit në Dhaka.

Zyrtarët e shëndetësisë thanë se gjatë natës familjarët kishin raportuar se reparti ishte bërë tepër i ftohtë, çka solli fikjen e sistemit të ajrit të kondicionuar për rreth një orë. Më pas, një prej foshnjave shfaqi komplikime dhe u transferua në njësinë e kujdesit intensiv neonatal, ndërsa pak orë më vonë të gjashtë foshnjat u përkeqësuan rëndë dhe u dërguan sërish në terapi intensive.

“Ne nuk besojmë se vdekjet e papritura lidhen me komplikime të trajtimit. Dyshojmë se mund të ketë pasur një problem teknik ose defekt”, deklaroi Prof. Zahid Raihan, zëvendësdrejtor i përgjithshëm i DGHS-së.

Ndërkohë, drejtori i përgjithshëm i institucionit, Prof. Pravath Chandra Biswas, tha se hetuesit konstatuan një “mjedis mbytës” në repart dhe mungesë ventilimi alternativ në rast se sistemi i kondicionimit ndalonte së funksionuari.

Policia, Departamenti i Hetimit Penal dhe një komision hetimor i ngritur nga qeveria po vijojnë hetimet, ndërsa autoritetet kanë kërkuar që raporti paraprak të dorëzohet brenda 72 orëve.