Irani shënjestron një bazë amerikane pas sulmeve të reja nga SHBA-ja

Korpusi i Gardës Revolucionare Islamike e Iranit, IRGC tha se ka shënjestruar një bazë ajrore amerikane në rajon, pas sulmeve të reja amerikane në Iranin jugor.

Garda Revolucionare e Iranit nuk tha se ku ndodhej baza, por Kuvajti, i cili strehon një bazë amerikane, tha se kishte kapur kërcënime armiqësore me raketa dhe dronë, pa specifikuar se nga vinin ato.

Më herët, ushtria amerikane tha se kishte rrëzuar dronë iranianë mbi Ngushticën e Hormuzit dhe kishte goditur një bazë ushtarake në Bandar Abbas, një qytet strategjik portual.

Armiqësitë kërcënojnë një armëpushim të brishtë midis SHBA-së dhe Iranit. Është hera e dytë brenda tre ditësh që SHBA-të kanë sulmuar objektiva në Iran, duke thënë se sulmet u kryen në vetëmbrojtje.

Komanda Qendrore Amerikane, Centcom tha se vendi në Bandar Abbas u godit ndërsa po bëhej gati të lëshonte një dron të pestë. Mediat iraniane raportuan se shpërthime u dëgjuan në lindje të qytetit.

Centcom i përshkroi veprimet e saj si të matura, thjesht mbrojtëse dhe të destinuara për të ruajtur armëpushimin.

Gjithashtu tha se forcat e saj rrëzuan katër dronë sulmues iranianë me një drejtim që përbënin një kërcënim rreth Ngushticës së Hormuzit.

Zëdhënësi i ministrisë së jashtme iraniane, Esmail Baqai, dënoi sulmet amerikane dhe tha se ato përbënin shkelje të armëpushimit.

Ai shtoi se republika islamike do të ndërmerrte të gjitha masat e nevojshme për të mbrojtur sovranitetin e saj kombëtar.