Donetsku i kontrolluar nga Rusia goditet nga dronët, vriten tre punëtorë të ujësjellësit

Një sulm me dron vrau tre punonjës të shërbimeve në rajonin e Donetskut të Ukrainës, i kontrolluar nga Rusia, tha kreu i autoriteteve lokale i instaluar nga Kremlini, Denis Pushilin.

Pushilin tha në Telegram se punëtorët, anëtarë të një ekipi riparimi të furnizimit me ujë, u goditën ndërsa ishin brenda një automjeti në Vuglehirsk, në veri të kryeqytetit rajonal me të njëjtin emër. Një punëtor i katërt u plagos rëndë, shtoi ai.

Sipas Pushilin, katër persona të tjerë u plagosën në një bastisje në një sektor tjetër të rajonit nën kontrollin rus.

Moska kërkon që Kievi t’i urdhërojë forcat e veta të tërhiqen nga pjesët e Donetskut që mban nën kontroll dhe thotë se lufta do të vazhdojë derisa të pushtohet i gjithë Donbasi.

Pushilin deklaroi në mars se forcat e armatosura ukrainase ende mbajnë kontrollin e rreth 17% të rajonit.

Trupat ruse po përparojnë ngadalë drejt Donetskut, por presidenti ukrainas Volodymyr Zelensky dhe zyrtarë të tjerë thonë se forcat e Kievit kanë rifituar terren dhe janë në pozicionin më të mirë që kanë qenë prej muajsh përgjatë frontit të gjerë prej 1,200 kilometrash.

Nga ana e saj, Ministria ruse e Mbrojtjes raportoi dje se njësitë kishin marrë kontrollin e fshatit Novovasylivka, në rajonin e Kharkiv, ku thotë se dëshiron të krijojë një zonë “neutrale”.

Në kufirin me Ukrainën, guvernatori rajonal rus në detyrë në Bryansk raportoi nëpërmjet Telegram se një sulm me dron ukrainas në një fshat mori jetën e një personi.

Ndërkohë, në rajonin qendror të Volgogradit në Rusi, guvernatori rajonal Andrei Bacharov tha se mbrojtja ajrore po përpiqej të sprapste një inkursion “masiv” nga dronë ukrainasë. Një pallat apartamentesh u godit dhe infrastruktura energjetike dhe civile u shënjestrua, por nuk pati raportime për viktima, tha guvernatori rajonal. Volgogradi është shtëpia e një rafinerie të madhe Lukoil.

Depot e karburantit janë përfshirë nga flakët pas një sulmi me dron ukrainas në rajonin Yaroslavl të Rusisë , në verilindje të Moskës, tha guvernatori Mikhail Yevrayev në Telegram, duke shtuar se puna për shuarjen e zjarrit po vazhdon.

Në total, Rusia rrëzoi 208 dronë gjatë natës, raportoi agjencia ruse e lajmeve Interfax, duke cituar Ministrinë e Mbrojtjes. Nga këta, më shumë se 80 u rrëzuan në rajonin e Rostovit në Rusinë jugore, thanë autoritetet lokale.

Në Ukrainë, një pjesë e portit në Izmail, në rajonin jugperëndimor të Odessa-s, u godit, ndërsa linjat e energjisë elektrike u goditën, duke rezultuar në ndërprerje të energjisë elektrike në pesë fshatra, thanë autoritetet lokale, pa përmendur deri më tani ndonjë viktimë.

Izmail, pranë kufirit me Rumaninë, është vendi ku ndodhet porti më i madh i Ukrainës në lumin Danub. Qyteti është shpesh shënjestër e bastisjeve ruse.