Gjuhë urrejtjeje kundër grave, Prokurorët rumunë shtojnë akuzë të re ndaj Andrew Tate

Prokurorët rumunë thanë të enjten se kanë zgjeruar një hetim penal ndaj Andrew Tate duke shtuar akuza për nxitje të urrejtjes dhe diskriminimit ndaj grave.

Tate dhe vëllai i tij Tristan kanë qenë nën hetim penal për akuza që përfshijnë trafikimin e qenieve njerëzore që nga dhjetori i vitit 2022, por të dy hetimet ende nuk kanë arritur në gjyq. Ata kanë mohuar të gjitha shkeljet.

Vëllezërit, të dy ish-kikbokserë me shtetësi të dyfishtë amerikane dhe britanike, fillimisht u mbajtën në paraburgim në pritje të hetimit, pastaj u vunë në arrest shtëpiak. Masat më vonë u zbutën në kontrolle të rregullta në polici. Në prill, një gjykatë rumune hoqi të gjitha masat parandaluese të kontrollit gjyqësor kundër tyre.

Ata dhe katër të dyshuar të tjerë janë nën hetim nën dyshimin për formimin e një grupi të organizuar kriminal, trafikim të qenieve njerëzore, trafikim të të miturve, marrëdhënie seksuale me të mitur dhe pastrim parash.

“Njësia e ndjekjes penale kundër krimit të organizuar (DIICOT) ka urdhëruar zgjerimin e hetimeve nën akuzën e nxitjes së vazhdueshme të urrejtjes ose diskriminimit”, thanë prokurorët në një deklaratë.

Ata thanë se ai e nxiti publikun drejt urrejtjes dhe diskriminimit ndaj grave përmes disa fjalimeve të promovuara në mediat sociale gjatë viteve 2021 deri në 2024.

Vëllezërit Tate kanë gjithashtu urdhër-arreste britanikë në pritje dhe do të ekstradohen pasi të përfundojnë procedurat gjyqësore në Rumani, ka vendosur një gjykatë rumune.

Tate përballet me 10 akuza penale në Britani, duke përfshirë përdhunim, dëmtim trupor, trafikim qeniesh njerëzore dhe kontrollim të prostitucionit për qëllime fitimi, tha të mërkurën Shërbimi i Prokurorisë së Kurorës në Mbretërinë e Bashkuar.