Shengeni Ballkanik, Rama, Zaev dhe Vuçiç do takohem në 29 korrik në Shkup

Kryeministri Edi Rama, homologu i tij, Zoran Zaev dhe presidenti Aleksandër Vuçiç zhvilluan sot një video-konferencë, në kuadër të Shengenit Ballkanik.

Ndërkohë janë zbardhur disa nga diskutimet që janë mbajtur gjatë këtij takimi.

“Vendet tona janë pjesë e Evropës dhe gjithmonë do të mbeten. Mos-suksesi i vazhdueshëm i BE-së për të mbajur premtimet dhe të hapë negociatat me RMV dhe Shqipërinë shkon kundër vullnetit të qytetarëve tanë dhe në kundërshtim me vetë BE-në. Duam që sa më shpejtë 4 liritë e Bashkimit Evropian të zbatohen në rajon. Ne do të bëjmë gjithçka, çfarë është në dorën tonë për ta mundësuar këtë”, thuhet në deklaratën e përbashkët të kryeministrave Rama, Zaev dhe presidentit serb, Vuçiç.

Sakaq, është deklaruar se më 29 korrik do të zhvillohet një takim në qytetin e Shkupit mes tre krerëve të shteteve për të firmosur marrëveshjet që dalin nga detyrimet e procesit të Berlinit.

“Si rajon jemi 18 milionë popullsi, mund ta forcojmë ekonominë tonë, të rrisim mirëqenien e qytetarëve tanë dhe të sjellim investime të mëdha që përndryshe nuk do të mund t’i sjellim si shtete veçmas. Më 29 korrik do të takohemi në Shkup për të firmosur marrëveshjet që dalin nga detyrimet e procesit të Berlinit, mes 3 shteteve tona. Marrëveshje për bashkëpunim dhe ndihmë në raste katastrofash natyrore, si dhe marrëveshje për lehtësimin e tregtisë, importit dhe eksportit mes vendeve tona”, thuhet më tej në deklaratë.

Shengeni Ballkanik është një nismë e përbashkët e presidentit Vuçiç dhe kryeministrave Rama e Zaev, e ndërmarrë me qëllim të përmirësimit të zhvillimit ekonomik dhe bashkëpunimit rajonal.

Ndërkohë, Kosova deri më tani nuk e njeh Shengenin Ballkanik dhe nuk ka marrë pjesë në asnjë nga takimet e zhvilluara më herët.

LEXONI GJITHASHTU:

• Shengeni Ballkanik, kryeministri Rama takim online me presidentin Vuçiç dhe homologun Zaev
• “Askush nuk është mbi ligjin”, Rama intervistë me Grenell, komenton vendimin për Berishëm