Rama shprehet se ristrukturimi i Policisë do të ndodhë më shpejt nga çfarë ishte planifikuar

Kryeministri Edi Rama u shpreh për Euronews Albania se Policia e Shtetit ka një nevojë të madhe sa i përket teknologjisë.

“Kur unë them që në ngjarjet në fjalë, sulmi ndaj Policisë së Shtetit është absurd, nuk kam parasysh që Policia e Shtetit nuk mund të bëjë më mirë, apo shumë më mirë punën e vet, absolutisht jo. Kam parasysh faktin që nuk është vetëm policia në një vend demokratik ajo që garanton gjithçka dhe që kontrollon sjelljen e njerëzve dhe individëve rrugëve, apo në konflikte mes tyre që ndodhin në pak në minuta dhe që s’ka polici në botë që mund t’i parandalojë. Policia e Shtetit ka nevojë për një mbështetje edhe më të madhe sa i përket teknologjisë”, u shpreh kreu i qeverisë.

Ai shtoi se ristrukturimin i Policisë së Shtetit do të ndodhë më shpejt nga çfarë ishte planifikuar.

“Ristrukturimi i policisë dhe në aspektin organizativ dhe aspektin e burimeve njerëzore dhe në aspektin e drejtimit, që nga niveli i drejtuesve në qarqe deri te nivelet më të ulëta, është një proces që ka nisur të diskutohet dhe konceptohet dhe që besoj do të materializohet edhe më shpejt seç ishte planifikuar”, tha kreu i qeverisë, teksa u pyet nga gazetarja e Euronews Albania, Eksiola Shehu.

LEXONI GJITHASHTU:

• “Policia e pranishme në të gjithë vijën bregdetare”, Rama thirrje subjekteve: Kush nuk ka dokumentacion të lirojë hapësirat
• Eksperti i sigurisë, Softa: Menaxhimi i hapësirës së vijës bregdetare duhet të bëhej që në dimër
• Konfliktet e vjetra po shkaktojnë vrasjet për menaxhimin e vijës bregdetare, thotë eksperti i turizmit, Besnik Vathi