Shtyhet seanca në KQZ për mandatin e kryebashkiakut të Mallakastrës

Komisioni Qendror i Zgjedhjeve ka shtyrë seancën për heqjen ose jo të mandatit të kryetarit të bashkisë së Mallakastrës, Qerim Ismailajt, i cili rezultoi se është dënuar në Greqi me tre vite burg.

Pritet që seanca e radhës të zhvillohet të premten në orën 11:00, vendim i marrë ky pas kërkesës së avokatit të kryebashkiakut, Besnik Strati, i cili kërkoi kohë shtesë për të paraqitur mbrojtjen me shkrim.

Avokati konfirmoi për Euronews Albania se ka bërë kërkesë në autoritetet greke për dokumentacion shtesë. Po ashtu, ai ka kërkuar informacion nga prokuroria, pasi nuk janë  njohur me provat.

Në vitin 1999, Qerim Ismailaj ai punonte në ndërtim në shtetit fqinj, në ishullin Hiot dhe pronari që e kishte punësuar në atë kohë nuk e kishte paguar për një punë të bërë dhe kishte një shumë të konsiderueshme parash për t’i dhënë.

Më pas, biznesmeni grek dhe kryebashkiaku i Mallakastrës janë takuar dhe janë përplasur fizikisht mes tyre.

Në momentin e sherrit shtetasi grek është rrëzuar e ka përplasur kokën në kalldrëm duke marrë plagë.

Pas kësaj, ai bëri kallëzim në polici, dhe menjëherë policia greke arrestoi Isamilajn, i cili u dënua me tre vite burg.

Prokuroria e Përgjithshme ka arritur në përfundimin se Qerim Ismailaj e prek ligji i dekriminalizimit.

Shkresa e Prokurorisë i është përcjell Komisionit Qendror të Zgjedhjeve.

LEXONI GJITHASHTU:

• Kryebashkiaku i Mallakastrës u dënua me 3 vite burg në Greqi pas sherrit me pronarin
• PD letër kryeprokurorit: Po pengoni dekriminalizimin! Asnjë përgjigje për Babanin dhe Ismailajn