Protesta në Tiranë hyn në ditën e 25-të, qytetarët mblidhen para godinës së Kryeministrisë

Presidenti i Republikës, Bajram Begaj, ka reaguar për herë të parë lidhur me protestat që po zhvillohen në Tiranë, duke theksuar se e drejta e qytetarëve për t’u shprehur dhe për të marrë pjesë në jetën publike është një vlerë e mbrojtur nga Kushtetuta por duhet të jetë në pajtim me Kushtetutën dhe ligjet e vendit.

Gjatë ceremonisë së 100-vjetorit të krijimit të Prefekturës së Tiranës, Begaj u shpreh se qytetarët po shprehin publikisht shqetësimet dhe pritshmëritë e tyre në mënyrë paqësore ndërsa theksoi se mbetet i përkushtuar në mbrojtje të Kushtetutës, të drejtave dhe lirive themelore të qytetarëve, si dhe në nxitjen e një klime bashkëpunimi dhe dialogu që i shërben interesit kombëtar.

“Ky aktivitet zhvillohet në një moment kur qytetarë po shprehin publikisht shqetësimet dhe pritshmëritë e tyre në mënyrë paqësore. Në respekt të pozicionit kushtetues, neutralitetit  kushtetues, mund të theksoj se e drejta për t’u shprehur dhe për të marrë pjesë në jetën publike është një vlerë e mbrojtur nga Kushtetuta, e cila duhet të ushtrohet në pajtim me Kushtetutën dhe ligjet e vendit.
Konsolidimi i demokracisë dhe zhvillimi i qëndrueshëm i vendit mbështeten në angazhimin e përbashkët të qytetarëve dhe institucioneve për të vepruar në përputhje me Kushtetutën dhe interesin  kombëtar dhe atë publik. Korniza kushtetuese,  së bashku me rregullat e shtetit ligjor dhe  demokracisë përbëjnë garancinë kryesore për funksionimin e drejtë të shoqërisë. Si President i Republikës, mbetem i përkushtuar në mbrojtje të Kushtetutës, të drejtave dhe lirive themelore të qytetarëve, si dhe në nxitjen e një klime bashkëpunimi dhe dialogu që i shërben interesit kombëtar dhe publik, të ardhmes evropiane dhe përkatësisë dhe vlerave Euroatlantike të vendit”, deklaroi Begaj.

Në ditën e 25-të të protestës, për të tretën herë radhazi u rilexuan kërkesat e protestuesve nga një prej pjesëmarrësve në tubim. Kujtojmë se këto kërkesa u artikuluan për herë të parë nga ish-luftëtari i UÇK-së, Dritan Goxhaj.

Kërkesat kryesore të rilexuara në shesh ishin:

• Dorëheqja e menjëhershme e kryeministrit Edi Rama dhe e qeverisë;
• Krijimi i një qeverie teknike tranzitore me mandat 12-mujor;
• Ndryshime kushtetuese dhe ligjore përmes referendumit, ku përfshihen:
  • Reformimi i Kodit Zgjedhor;
  • Rregulla të reja për financimin e partive politike;
  • Kufizimi i mandatit të kryeministrit në maksimum dy mandate;
• Anulimi i ndryshimeve në ligjin për Zonat e Mbrojtura;
• Anulimi i ndryshimeve në ligjin për Trashëgiminë Kulturore;
• Shfuqizimi i “Paketës së Maleve”;
• Shfuqizimi i statusit dhe kuadrit ligjor të investitorit strategjik;
• Hartimi i një kontrate të re sociale mes qytetarëve dhe shtetit shqiptar.

“Shqiptarët nuk do të tolerojnë më këta njerëz të korruptuar që kanë zënë vend dhe nuk shkulen nga karriget e institucioneve shqiptare. Përshkallëzimi do të shkojë deri në bllokimin e institucioneve, nëse këta zyrtarë të korruptuar do tentojnë të vazhdojnë t’i uzurpojnë ato me dhunë”, u shpreh ai.

Ka nisur marshimi i qytetarëve nga sheshi “Skëndërbej” drej Kryeministrisë edhe këtë të mërkurë kur regjistrohet dita e 25-të e protestës.

Grumbullimi i qytetarëve nisi në orën 19:00 dhe pas pak minutash ata u nisën drejt Kryeministrisë. Ata shihen me pankarta dhe flamuj në duar teksa vijonë thirrjet për dorëheqjen e kryeministrit Edi Rama.

Kryeministri Edi Rama ka komentuar protestat kundër investimit prej 4 miliardë dollarësh në Zvërnec, duke i lidhur ato jo vetëm me pakënaqësi të brendshme, por edhe me ndikime të jashtme që, sipas tij, synojnë të pengojnë projektin.

Në një intervistë për televizionin francez “France 24”, Rama tha se në këtë situatë mund të jenë të përfshira aktorë të ndryshëm ndërkombëtarë, përfshirë Iranin dhe vende apo faktorë rajonalë që, sipas tij, nuk e mirëpresin zhvillimin ekonomik të Shqipërisë.

Ai përmendi gjithashtu se Shqipëria ndodhet prej vitesh në një konflikt kibernetik me Iranin, duke sugjeruar se kjo klimë mund të ketë ndikim edhe në zhvillime të tjera politike dhe shoqërore në vend.

Sipas Ramës, protestat në kryeqytet nuk pasqyrojnë domosdoshmërisht qëndrimin e zonës ku pritet të realizohet investimi. Ai theksoi se në Vlorë, ndryshe nga Tirana, projekti shihet më pozitivisht nga banorët lokalë.

Kryetari i Partisë Demokratike, Sali Berisha, në një deklaratë për mediat këtë të mërkurë është ndalur edhe te protestat që po zhvillohen në Tiranë, konkretisht te pesë kërkesat që u lexuan dy ditë më parë nga Dritan Goxhaj.

I pyetur nga gazetarët, Berisha tha se ndër kërkesat e paraqitura përfshihet dorëheqja e menjëhershme e Kryeministrit Edi Rama, një kërkesë që sipas tij Partia Demokratike e mbështet pa asnjë rezervë.

Ndërkohë ai shtoi se po ashtu mbështet edhe propozimin për kufizimin e mandatit të kryeministrit në dy mandate, duke theksuar se PD është plotësoshtë dakord dhe se që nesër e voton këtë nismë.

“Në kërkesat e lexuara e të paraqitura nga Goxhaj, ripërsëritet dorëheqja e menjëhershme e Edi Ramës. Kërkesë kjo që ne e mbështesim pa asnjë rezervë, fuqimisht dhe kemi po atë thirrje. Së dyti, kërkohet, ndër pesë kërkesat e para, është kufizimi i mandatit të kryeministrit në dy mandate. Partia Demokratike është plotësisht dakord. Plotësisht dakord! Që nesër është e gatshme të votojë në parlament dhe të bëjë thirrje qytetarëve të votojnë për një masë të tillë.

Pse kjo? Sepse u bë e qartë se Edi Rama nuk lejon rotacionin e pushtetit. Nuk lejon. Për këtë jo se e themi ne, tashmë e thonë dokumentet ndërkombëtare. Atëherë ka një mençuri, ta përcaktojë kushtetuta, ta largojë kushtetuta.

Dhe të them dhe një gjë, si kryeministër, në qoftë se ti punon për një program, tetë vite i ke absolutisht të mjaftueshme. Jo për zbatimin 100% të tij nuk them, po për zbatimin e pikave më kryesore të tij dhe për zbatimin e tij në masën 80-90%.

Pra, çfarë qëndron në rastin e Edi Ramës, qëndron se ai qëndron në pushtet pa zgjedhje. Me farsë elektorale, me farsë elektorale. Dhe unë kuptoj që protestuesit duan t’i japin një përgjigje të tillë nëpërmjet ndryshimit të Kushtetutës.

Përsa u përket ligjeve të tjera, ju jeni dëshmitarë. Ata që përpiqen të fshijnë memorien është tjetër punë, memoria nuk fshihet. Kjo parti ka luftuar më shumë se kushdo tjetër kundër atyre ligjeve. Ka ndjekur çdo procedurë të mundshme kundër tyre, qoftë kundër amendimit të ligjit për mbrojtjen e zonave të mbrojtura, për trashëgimisë kulturore, për koncesionet, PPP-të dhe investimet strategjike”, u shpreh ai.

Në një lidhje live për Euronews Albania me Thimi Samaraxhiun, komandanti Hysni Gucati dha më shumë detaje sa i përket debatit lidhur me Dritan Goxhajn dhe dokumentet e publikuara nga Kryeministri Rama, nëse ato janë autentike dhe cili ka qenë roli i Dritan Goxhajt si anëtar i luftëtarëve të UÇK-së.

Sipas tij, dokumenti i publikuar nga Kryeministri Rama përsa i përket firmës është origjinale dhe i përket komandant Plakut, teksa thekson se Dritan Goxhaj nuk është anëtar i Organizatës së Veteranëve të Luftës.

“Po, duke njohur firmën e komandant Plakut, se komandant Plakun e ka njohur personalisht edhe komanda, por edhe familjen e tij e njoh personalisht dhe firma është e komandant Plakut, është origjinale. E Xheladin Gashit është origjinale firma.

Firma është origjinale, përmbajtjen e letrës e kam lexuar, e kam parë, por firma është origjinale e komandant Plakut, i cili e ka nënshkruar në atë kohë në territorin apo në tokën e Shqipërisë. Unë Dritan Goxhajn e kam njohur vonë. Unë babanë e tij e kam njohur më herët.

Dritan Goxhaj është mirë të dalë e të deklarojë se në cilën zonë operative ka qenë në luftë, në cilën brigadë ka qenë në luftë dhe çfarë ka vepruar në territorin e Kosovës apo të Shqipërisë që ka punuar për Ushtrinë Çlirimtare të Kosovës. Unë e njoh në respekt për këtë kështu, por për Dritan Goxhajn vetëm një gjë garantoj apo mund t’ju flas 100%, Dritan Goxhaj nuk është anëtar i Organizatës së Veteranëve të Luftës. Kjo është e vërtetë.

Tani, nuk ka dokumentacion, nuk ka certifikatë të veteranit, nuk ka letërnjoftim tek ne, nuk ka aplikacion të mundshëm dhe nuk ka kartelë të veteranit. Kjo është e vërtetë 1 milion për qind. Për këtë që flas, jap llogari unë, jap llogari para Zotit dhe para njeriut”, u shpreh ai.

Përfaqësuesi politik i AAK-së Labinot Bislimi këtë të mërkurë ka qenë pjesë e një posti të shpërndarë nga Kryeministri Edi Rama. Rama në postin e tij tregon sesi Bislimi nëpërmjet një statusi i quan protestat në Shqipëri të organizuar me qëllime sipas tij anti-kombëtare.

Kryeministri Edi Rama këtë mërkurë ka shpërndarë në “Facebook” një video dhe mbishkrimin e një postimi të një qytetari të cilin e ka cilësuar si një të panjohur bujar. Në video duket Rama teksa teksti i këngës ndër të tjera thekson se vendi është gjëja e parë që i shkon në mendje dhe se qytetarët nuk i shohin betejat në prapaskenë vetem shkëlqimin në skenë.

Postimi i qytetarit ndër të tjera përshkuan se përmes videos ka provuar të veshë këpucët e kryeministrit. Rama shkruan ky është një postim që i ka ardhur mes mesazheve të shumta të këqija dhe të mira. Ai shtoi se një person tjetër ia ka dërguar këtë postim.

Postimi i plotë:

MIRËMËNGJES

dhe me një nga mesazhet e shumta të këtyre ditëve të habitshme në të keq e në të mirë, të cilin dikush bujarisht e ka postuar e një tjetër miqësisht ma ka dërguar, ju uroj një ditë të mbarë

***Ja profili i të panjohurit bujar që më çoi miku me statusin e postimit të videos

@mr.elprofe

Provova t’i vesh për pak çaste këpucët e kryeministrit.

Jo për t’i bërë lajka. Jo për të bindur askënd.

Thjesht për të parë si do ta shihja unë botën në vendin e tij.

Jam rritur në një Shqipëri ku nuk bëje dot 200 metra pa t’u grisur këpucët.

Do të ishim naivë po të thoshim se nuk janë bërë edhe gjëra të mira.

Kjo nuk do të thotë se çdo gjë është perfekte. As që nuk janë bërë gabime.

Por për sqarim:

Unë nuk ha bukë nga shteti shqiptar që prej vitit 1997.

Nuk jam as i shitur. As i blerë.

Dhe nuk mbështes verbërisht askënd.

Kjo këngë është thjesht një përpjekje për të parë anën tjetër të historisë.

Një kundërrrymë ndaj asaj që dëgjojmë çdo ditë.

E di që do shahem.

Por s’ka problem.

Sepse në fund të fundit:

I shari shan. I mençuri mendon.

I Carried The Storm