Tenderi për uniformat e policisë, arrestohen disa zyrtarë dhe ish-zyrtarë të Ministrisë së Brendshme

Nëntë zyrtarë dhe ish-zyrtarë të Ministrisë së Brendshme janë arrestuar pas një operacioni të udhëhequr nga SPAK lidhur me abuzimet në tenderët publikë.

Më konkretisht, bëhet fjalë për tenderin e uniformave të policisë, vlera e të cilit arrin në 25 milionë euro.

SPAK ushtroi kontrolle në banesa e zyra të personave të dyshuar për abuzime me prokurimet publike lidhur me tenderin e vitit 2020, në përfundim të të cilave u vendos arresti me burg për anëtarët e Njësisë së Prokurimit Flutura Çekrezi, Ani Omuri, Kleviz Hasani. Në burg ndodhen dhe anëtarët e Komisionit të Vlerësimit të Ofertave, Kreshnik Bejkaj, Fatmir Femneri, Mariglen Buzali, Gëzim Mingaj.

Ata në bashkëpunim me njëri-tjetrin dhe me drejtoreshën e Agjencisë së Blerjeve të Përqendruara Edlira Naqellari, të shkarkuar në 1 korrik nga ministri i Brendshëm Bledi Çuçi akuzohen se kanë shkelur rregullat e prokurimit publik, barazinë në tenderë dhe kanë shkaktuar dëm ekonomik.

Personat e arrestuar akuzohen se kanë avantazhuar kompaninë fituese të tenderit “D&E SHPK”.

Rreth një vit më parë grupi parlamentar demokrat i opozitës brenda Parlamentit kallëzoi në prokurori 2 ministra, 4 zyrtarë përgjegjës për tenderët publikë dhe 2 kompani private, të cilët i akuzon për shpërdorim detyre dhe korrupsion në lidhje me tenderin prej 25 milionë eurosh të sigurimit për 4 vjet me uniforma të punonjësve të policisë.

Në kallëzimin e depozituar në Strukturën e Posaçme Anti-Korrupsion (SPAK), të cilin Euronews Albania e shqyrtoi, deputetët e opozitës parlamentare akuzojnë ministrin e Brendshëm Sandër Lleshaj, ministren e Mbrojtjes Olta Xhaçka, drejtuesen e Drejtorisë së Blerjeve të Përqendruara (ABP), Edlira Naqellarin, anëtarët e Komisionit të Vlerësimit të Ofertave (KVO) Kreshnik Bejkaj, Mariglen Bazali dhe Fatmir Derhemi dhe kompanitë “Marsi &Al” dhe D&E shpk, se krijuan kushtet për të paracaktuar fituesin e tenderit.

LEXONI GJITHASHTU:

• Opozita parlamentare kallëzon në SPAK ministrat Lleshaj e Xhaçka, akuza se paracaktuan tenderin e uniformave të policisë
• Arrestohet kryetari i Bashkisë së Lushnjës, Fatos Tushe