Tenderët problematikë, Basha ironizon Ramën për deklaratën e tij

Kreu i Partisë Demokratike, Lulzim Basha ironizoi kryeministrin Rama sa i takon deklaratës së tij për tenderët problematikë.

Ka 8 vite në pushtet dhe sot më në fund pranoi se qeveria e tij e ka zhytur vendin në korrupsion. Ajo që ai nuk thotë dhe është e qartë për të gjithë shqiptarët është se PESHKU QELBET NGA KOKA!

— Lulzim Basha (@lulzimbasha_al) July 13, 2021

Sipas Bashës, pas tetë vitesh në pushtet, Rama më në fund pranoi se “qeveria e tij ka zhytur vendin në korrupsion”.

Duke përdorur shprehjen popullore “peshku qelbet nga koka”, kryedemokrati solli në vëmendje se problemet me tenderët janë si pasojë e mungesës së transparencës dhe vullnetit të qeverisë Rama.

“1 në 3 tendera jepen pa garë dhe ky është fakt është denoncuar nga PD që nga viti 2015 dhe njëkohësisht është provuar edhe në vitin 2018 nga Gjykata Europiane e Auditit,” – shtoi JoridaTabaku në një deklaratë për mediat.

Sipas saj mbi 2 miliard euro janë koncesione të dhëna nga qeveria Rama me ofertë të pakërkuar dhe pa garë te kompanitë e preferuara.

Tabaku përmendi gjithashtu dhe inceneratorët që ende marrin para nga taksat e qytetarëve.

Gjatë takimit me ministrat dhe titullarët e institucioneve kontraktore, Rama deklaroi se 70% e tenderëve rezultojnë me probleme sa i takon hartimit të kritereve, ndërsa 20% e institucioneve nuk kanë reaguar ose nuk kanë reflektuar ndaj rekomandimeve të Agjencisë së Prokurimeve Publike.

Në një takim të premten me kryetarët e bashkive, kryeministri Rama tha se ligji i ri për prokurimet publike është vënë në zbatim dhe për mirëmenaxhimin ose keqmenaxhimin do të mbajnë përgjegjësi direkt kryebashkiakët.

LEXONI GJITHASHTU: 

• “Fatos Tushe do të përjashtohet nga PS”, Rama paralajmëron kryebashkiakët për prokurimet publike
• “70% e tenderëve me probleme”, Rama-ministrave: Nëse nuk reagoni pas rekomandimeve, do shkoni në SPAK
• “Keni 100 ditë kohë”, kryeministri Rama paralajmëron ristrukturim të policisë së shtetit