Kancelarja Angela Merkel: Vaksinimin nuk do ta bëjmë me detyrim

Sikurse në vende të tjera, ritmet e vaksinimit në Gjermani kanë nisur të ngadalësohen, duke e bërë më të vështirë për autoritetet frenimin e infektimeve me variantin Delta.

Rreth 43 për qind e popullsisë ështtë tërësisht e vaksinuar dhe kancelarja Merkel i ka bërë thirrje pjesës së mbetur që ta ndërmarrë këtë hap.

Por ajo tha se qeveria nuk ka ndërmend ta bëjë të detyrueshme vaksinën për punonjësit e shëndetësisë.

 “Ne nuk do të ndjekim shembullin e propozuar nga Franca. Ne jemi në fillim të një faze ku ende po promovojmë vaksinimin, ku kemi më shumë vaksina sesa njerëz që duan të vaksinohen”, tha Merkel. 

Presidenti francez Emmanuel Macron njoftoi vaksinimin e detyrueshëm për stafin mjekësor. Qeveria e tij ka sqaruar se do të përpiqet të jetë më fleksibël në aplikimin e kufizimeve të reja mbi vaksinimin.

“Numri i adoleshentëve që kanë marrë një vaksinim të plotë aktualisht është i ulët dhe natyrisht është e pamundur t’u imponojmë atyre dhe familjarëve të tyre një verë të vështirë, me anë të lejes së kalimit. Për këtë arsye ministri i Shëndetësisë ka diskutuar çështjen me ekspertë të shkencës dhe shëndetit, në mënyrë që të mund të komunikojmë rregulla më fleksibël për t’iu përgjigju situatës”, tha Gabriel Attal, zëdhënës i qeverisë franceze.

 Ndërkohë, në Evropë vende të ndryshme po përpiqen të përshpejtojnë programet e vaksinimit teksa varianti i ri po përhapet. Në Spanjë, të rinjtë janë vënë në radhë gjatë natës për të marrë dozën  në spitale.