120 të vdekur nga përmbytjet masive në Evropë, shumica në Gjermani e Belgjikë

Të paktën 120 persona kanë vdekur dhe disa qindra të tjerë konsiderohen të zhdukur në Evropë, pas përmbytjeve masive që përfshinë pjesën perëndimore të kontinentit të vjetër.

Shirat rekord bënë që lumenjtë të dalin nga shtretërit dhe të shkatërrojnë të gjithë rajonin.

Në Gjermani, ku bilanci i vdekjeve ka shkuar mbi 100, kancelarja Angela Merkel bëri thirrje për një betejë të vendosur kundër ndryshimeve të klimës.

Ndërkohë, në Belgjikë, ku llogariten të paktën 20 të vdekur, kryeministri Alexander De Croo shpalli 20 korrikun ditë zije.

“Ne jemi ende në pritje të bilancit përfundimtar, por kjo mund të jetë përmbytja më e rëndë që vendi ynë ka përjetuar ndonjëherë”, tha De Croo.

Ndërkohë, në Holandë, Luksemburg dhe Zvicër nuk ka një bilanc viktimash, pavarësisht se përmbytjet kanë qenë të mëdha.

Shumë faktorë kontribuojnë tek përmbytjet, por ngrohja e atmosferës e shkaktuar nga ndryshimet e klimës i bën shirat ekstreme më të shpeshta.

Bota është ngrohur ndjeshëm që nga nisja e epokës industriale dhe temperaturat do të vazhdojnë të rriten nëse qeveritë në mbarë botën nuk ndërmarrin hapa për të ulur emetimet e gazrave.