Një votë e 25 prillit kushton 85 lekë, katër partitë që do përfitojnë nga buxheti i shtetit

Për zgjedhjet parlamentare të këtij viti, nga buxheti i shtetit u shpërndanë 130 milionë lekë, dyfish krahasuar me zgjedhjet e katër viteve më parë.

Kështu, pjesën më të madhe të parave do t’i marrë Partia Socialiste që ka siguruar më shumë vota, mbi 768 mijë, e përkthyer në para, 65 milionë lekë. Pas saj, vjen Partia Demokratike, mbi 622 mijë vota dhe e përkthyer në para 52 milionë lekë.

E treta, renditet Lëvizja Socialiste për Integrim me mbi 107 mijë vota dhe përfiton 9 milionë lekë. Dhe në fund është Partia Socialdemokrate, e cila mori mbi 35 mijë vota dhe përfiton 3 milionë lekë.

Për shkak të ndryshimeve në Kodin Zgjedhor që u bënë një vit më parë, nga fondi nuk përfitojnë partitë e vogla që garuan me siglën e Partisë Demokratike. Bazuar në projektvendimin e publikuar nga KQZ, asnjë nga partitë e vogla nuk përfiton para.

Megjithatë, do të pritet edhe vendimi i Komisioneri Shtetëror Zgjedhjeve për të parë sesi do të ndahen paratë në koalicionin Partia Demokratike- Aleanca për Ndryshim.

Miratimi i ndarjes së fondeve nga Komisioneri Shtetëror Zgjedhjeve ishte parashikuar të mbahej këtë të hënë, por është shtyrë, pasi një subjekt zgjedhor ka kërkuar më tepër kohë për t’u njohur me aktet.