Një tjetër Kurban Bajram që nuk festohet në xhaminë e Namazgjasë

Edhe këtë vit, besimtarët myslimanë nuk e kanë festuar “Kurban Bajramin” në Xhaminë e Madhe të Tiranës.

“Xhamia e madhe financohet nga një vend tjetër, nga një popull tjetër mik dhe ende nuk e dimë se kur do të hapet”, tha nënkryetari i Komunitetit Mysliman, Taulant Bica, për xhaminë e Namazgjasë, e njohur si Xhamia e Madhe e Tiranës, e cila nisi të ndërtohet para gjashtë vitesh, në 2015-tën, por ende nuk i ka hapur dyert për besimtarët.

Ndryshe nga një vit më parë ku kishte kufizime për shkak të pandemisë, sot besimtarët po i kryejnë festimet e “Kurban Bajramit” si zakonisht, me falje në Sheshin Skënderbej dhe pranë xhamive të tjera.

“Kurbani Bajrami i vjetshëm kaloi me më shumë vështirësi, ndërsa këtë vit po e festojmë ashtu siç i ka hije”, tha Taulant Bica për Euronews Albania.

Mirëpo jo të gjitha ritualet myslimane janë kthyer në normalitet, pasi shumë besimtarë janë privuar nga marrja pjesë në “ritualin e Haxhit”, ku besimtarët bëjnë pelegrinazh për në Mekë, që është vendi më i shenjtë për myslimanët.

“Kemi dy vite që nuk kryhet “rituali i Haxhit”, që është një ndër adhurimet kryesore ku çdo besimtar mysliman e ka obligim që të shkojë të paktën një herë në jetë për të vizituar vendin e shenjtë për besimtarët myslimanë”, u shpreh z. Bica.

LEXONI GJITHASHTU:

• Besimtarët myslimanë festojnë sot Kurban Bajramin, falin namazin pranë xhamive