Prezantohet strategjia për mbrojtjen e të drejtës së autorit

Ministria e Financave ka hartuar strategjinë për pronësinë intelektuale dhe të drejtën e autorit duke e publikuar atë për konsultim publik.

Me këtë strategji, ministria synon të administrojë dhe të mbrojë të drejtat, të cilat ushtrojnë një ndikim të fuqishëm në mirëfunksionimin e ekonomisë dhe forcimin e rregullave të një konkurrence të drejtë.

Dokumenti përcakton hartimin e një reforme ligjore në vitin e ardhshëm në fushën e pronësisë industriale dhe miratimi i ligjeve të veçanta organike për çdo objekt të pronësisë industriale, patentat, markat tregtare, modelet e përdorimit dhe skicat industriale.

Brenda vitit 2023 synohet aderimi me “Ligj në Traktatin e Singaporit të Ligjit të Markave Tregtare”.

Kjo paketë parashikohet që të ketë një kosto që shkon në 600 milionë lekë brenda 4 viteve të ardhshme.

330 milionë lekë parashikohen për rritjen e ndërgjegjësimit të publikut lidhur me të drejtat e pronësisë intelektuale përmes fushatave informuese, ndërsa 160 milionë të tjera parashikohen shpenzime për zhvillimin dhe forcimin e institucioneve të përfshira në zbatimin e të drejtave të autorit.

Pronësia intelektuale dhe e drejta e autorit ka qenë një ndër çështjet më problematike në Shqipërinë e 30 viteve të fundit, ku nuk kanë munguar shkeljet, por edhe ndëshkimet nga organizma ndërkombëtarë për cenimin e kësaj të drejte.