Presidenti Meta dekreton emërimin e Artur Kalasë në Gjykatën e Lartë

Presidenti Meta dekretoi sot emërimin e Artur Kalasë si gjyqtar të Gjykatës së Lartë.

Kalaja ishte një nga tre kandidaturat që shfaqën “integritet të lartë etik dhe profesional” në procedurën e nisur në muajin korrik nga Këshilli i Lartë Gjyqësor (KLGJ) për plotësimin e vendeve bosh në Gjykatën e Lartë.

Bashkë me të kandiduan Asim Vokshi dhe Gent Medja. KLGJ i propozoi Presidentit ta emëronte Kalanë gjyqtar në fushën e së drejtës civile.

Me këtë emërim të ri, Gjykata e Lartë, bëhet me 8 gjyqtarë, nga 19 anëtarë, që duhet të ketë, sipas vendimmarrjes së KLGJ-së.

Përmes një njoftimi për shtyp Presidenti i bëri thirrje KLGJ-së që të vijojë pa vonesa procedurat për emërimet e tjera në mënyrë që ta kthejë sa më shpejt funksionalitetin e plotë të kësaj gjykate.

Kalaja është pjesë e sistemit të drejtësisë prej vitit 2000. Fillimisht ka qenë gjyqtar i Gjykatës së Elbasanit e më pas prej vitit 2006 në Gjykatën e Apelit Tiranë.

LEXONI GJITHASHTU:

• Zyrtarët e drejtësisë japin propozime për strategjinë e reformës 2021-2025
• Rezultatet e “Drejtësisë së Re”, 155 gjyqtarë e prokurorë të shkarkuar, BKH ende nuk ka nisur punën
• Ambasadorja Kim: Koha që shqiptarëve t’u kthehet besimi te drejtësia
• Ambasadori Soreca: Epokë e re për sundimin e ligjit në Shqipëri