15 anëtarë të PD-së në Korçë japin dorëheqjen

Anëtari i Këshillit Kombëtar të PD-së, Andrea Mano dhe sekretari i PD-së në qarkun Korçë, Devis Osmani, bashkë me 13 anëtarë të kryesisë së degës ka dhënë dorëheqjen.

Sipas tyre këto dorëheqje vijnë, pasi kryetari i PD-së Lulëzim Basha me arrogancën e tij po kthen partinë në një parti klienteliste dhe në funksionon të interesave personale.

Zyrtarët e PD-së nënvizojnë se dorëheqja ka ardhur edhe si pasojë e veprimeve të kryetarit Basha, i cili ka hedhur poshtë punën e ngritur me mund e sakrifica gjatë 8 viteve opozitë.

Anëtarët e PD theksojnë se kanë parë të pamundur ushtrimin e funksioneve të tyre në të tilla kushte.

Javët e fundit në PD ka pasur zëra kundër. Kryetari i Këshillit Kombëtar në PD, Bujar Nishani e cilësoi Kuvendin Kombëtar të kësaj partie një teatër absurd që duhet të harrohet sa më shpejt.

Ndërsa, drejtuesi politik i qarkut të Lezhës, Mark Marku, gjatë fjalës në Kuvendin Kombëtar tha se Partia Demokratike ndodhet në pikë kritike.

Rreth dy javë më parë, delegatët e Kuvendit Kombëtar të PD-së zgjodhën 300 anëtarët e rinj të Këshillit Kombëtar, proces që u zhvillua në Pallatin e Kongreseve.

LEXONI GJITHASHTU:

• Kuvendi Kombëtar i PD-së, demokratët do të zgjedhin 300 anëtarët e Këshillit Kombëtar
• Mark Marku në Kuvendin Kombëtar: PD në gjendje kritike, duhet strategji e re