Raporti i OSBE-ODIHR e cilësoi ‘potencialisht të paligjshme’, Basha komenton strukturën e PD për mbrojtjen e votës

Kryetari i PD, Lulzim Basha u pyet nga Euronews Albania gjatë konferencës së sotme të opozitës lidhur me vlerësimin që raporti zgjedhor i OSBE-ODIHR i bëri strukturës që PD ngriti me arsyetimin se do të mbronte votën, si “potencialisht të paligjshme”.

Basha u shpreh se PD do ta zhvillojë, përmirësojë dhe shtrijë kudo mbrojtjen e votës, duke e cilësuar atë si “një detyrë të lartë patriotike, demokratike, qytetare dhe ligjore”.

Për gazetarët kryedemokrati u shpreh se policia dhe prokuroria duhet të jenë strukturat për mbrojtjen e votës, mirëpo edhe partitë duhet të bëjnë pjesën e tyre.

Në fillim të muajit prill, PD lajmëroi ngritjen e asaj që e cilësoi “një strukturë të organizuar nga juristët më të mirë që ka vendi, penalistë dhe profesionistë të tjerë të fushave të ndryshime me fokus monitorimin e shkeljes së ligjit gjatë zgjedhjeve dhe raportimin e tyre në KQZ, në prokuroritë e rretheve dhe në SPAK.

Raporti i OSBE-ODIHR zbuloi se Partia Socialiste pati avantazh domethënës nga kontrolli i pushtetit lokal dhe nga keqpërdorimi i burimeve shtetërore.

Basha deklaroi gjithashtu se raporti i OSBE-ODIHR konfirmoi se 25 prilli ishte një masakër zgjedhore. Ai tha se blerja e votës, keqpërdorimi i administratës, vjedhja e të dhënave me sistemin e patronazhistëve, përdorimi i grupeve kriminale në zgjedhje, ndryshimi i fletëve të votimit dhe mbyllja e kufijve, janë pika që theksohen në raport, por që janë denoncuar më herët edhe nga demokratët.