Policia arreston drejtuesin e mjetit që u iku gjatë aksionit antidrogë, sekuestrohet 1,2 kilogramë kokainë

Policia ka arrestuar drejtuesin e automjetit që u iku gjatë operacionit antidrogë mesditën e së martës në kryeqytet dhe që u bë shkak i përplasjes së tyre me dy gazetarë.

Burime bëjnë me dije se personi i arrestuar quhet Altin Gega. Bashkë me të janë arrestuar dhe 3 persona të tjerë, 2 prej të cilëve kane qenë në automjetin tip ‘Benz’, ndërsa personi tjetër i arrestuar ka qenë në një tjetër automjet.

Policia ka sekuestruar 1 kilogramë e 128 gramë kokainë.

Përmes një njoftimi zyrtar policia sqaron se gjatë operacionit, drejtuesi i automjetit nuk i është bindur urdhrit të punonjësve të policisë për të hapur dyert e makinës dhe është larguar me shpejtësi duke rrezikuar jetën e punonjësve të policisë.

Arrestimi i tij është bërë i mundur disa minuta më vonë, pas ndjekjes nga ana e policisë.

Operacioni antidrogë i policisë u bë publik pas publikimit të një videoje ku shihen efektivë të Forcave Speciale të ushtrojnë dhunë ndaj 2 gazetarëve në Tiranë, të cilët rastësisht ishin të pranishëm në vendin e ngjarjes

Gazetari Ergys Gjençaj dhe kolegia e tij Klodiana Lala nga televizioni News 24 u përballën me dhunë fizike dhe verbale nga efektivët e policisë, të cilët shfaqen që shtrinë në tokë gazetarin Gjençaj, shtynë gazetaren Lala dhe tërheqin me forcë një qytetare në një biznes ngjitur.

LEXONI GJITHASHTU:

Policia dhunon dy gazetarë, po filmonin një aksion antidrogë në Tiranë