Opozita braktis Kuvendin, dështon debati mbi bilancin 100 ditor të qeverisë “Kurti”

Kuvendi i Kosovës u mblodh këtë të hënë me kërkesë të Partisë Demokratike për të bërë bilancin e 100 ditëve të para të qeverisë “Kurti”, por me kërkesë të Lëvizjes Vetëvendosje u ndryshua rendi i ditës.

Para debatit për bilancin u vendos që të votohej zgjedhja se kryesuesit dhe dy anëtarëve të Bordit të Zyrës së Rregullatorit të Energjisë si dhe Zgjedhjen e tre anëtarëve të Komisionit të Pavarur të Mediave.

Për këtë arsye partitë opozitare, PDK, LDK dhe AAK kanë braktisur sallën e Kuvendit. Para largimit nga mbledhja, deputeti i PDK-së, Ferat Shala, ka thënë se ky proces është i paligjshëm. 

“Sot po i nënshtrohemi një procesi tërësisht të paligjshëm administrativ dhe juridikisht. Sot po nënshtrohemi edhe një presioni të shumicës parlamentare duke shkelur çdo procedurë, etikë dhe parim”, u shpreh Ferat Shala, deputet i PDK.

Pavarësisht mungesës së opozitës, deputetët e Kuvendit të Kosovës kanë zgjedhur kryesuesin dhe dy anëtarë të Bordit të Zyrës së Rregullatorit të Energjisë. Por, kanë dështuar të zgjedhin edhe tre anëtarët e Bordit të Komisionit të Pavarur të Mediave, pasi shumica nga ata e kanë prishur fletëvotimin, duke e bërë atë të pavlefshëm në votim.