Transporti urban në Shkodër, 24 orë jashtë funksionit

Të gjithë urbanët në Shkodër do të ndalojnë shërbimin për 24 orë në shenjë proteste.

Melidon Dervishi, drejtuesi i kompanisë së transportit publik atje, shprehet se çmimi i naftësa është rritur ndërkohë që numri i udhëtarëve është ulur.

Ai konfirmoi për Euronews Albania se konsumi i naftës është shtuar dhe për shkak të trafikut të rënduar, ndërsa bashkia Shkodër nuk po bën asnjë rimbursim.

Në këto kushte sipas tij ofrim i shërbimit të transportit urban është i pamundur.

Për Artur Bacin, shofer autobusi është keqmenaxhimi i trafikut në qendër të qytetit problemi kryesor që vështirëson shërbimin.

Dervishi deklaroi se nëse kërkesat nuk merren parasysh atëherë protesta mund të përshkallëzohet.

Për situatën ka reaguar dhe Bashkia Shkodër e cila përmes një deklarate solli në vëmendje se operatori i licencuar për të ofruar transportin urban në qytet ka firmosur një kontratë 5-vjeçare të cilën duhet ta zbatojë.

Shoqëria ka aplikuar sipas kritereve dhe kushteve të konkurrimit dhe ka rënë dakord, thuhej në deklaratën e cila specifikonte se Bashkia Shkodër do të respektojë ligjin dhe të njëjtën gjë pret dhe nga operatori në fjalë.

LEXONI GJITHASHTU:

• Transporti ndërqytetës në Korçë proteston për koston e shtuar të parkimit
• Nis vaksinimi për transportin publik, Mema: Lajm shumë i mirë, ka qenë kërkesë e jona e vazhdueshme
• Enton Punavia: Transporti publik u ndikua nga pandemia, heqja e abonesë ishte e domosdoshme