Festa e Bjeshkëve, në Sylbicë të Tropojës promovohet tradita dhe trashëgimia kulturore

Nuk mund të mos ndodhte që në fillim të gushtit, në bjeshkët e larta tonat të mbahej festa traditë ajo e të gjedhëve të imta. Këtu jemi në bjeshkët e Sylbicës dhe sikurse e do zakoni të gjithë bjeshkatarët që muajt e verës i kanë kaluar në stan për të veruar bashkë me bagëtitë, bëhen gati për ta festuar si duhet, punën e madhe disa mujore që kanë bërë gjatë verës.

Bashkia e Tropojës u kujdes që gjithçka të shkonte sipas planifikimeve, që festa të kishte edhe këngën edhe vallen e Tropojës, ndërsa vetë bjeshkatarët u kujdesën për ushqimin e freskët dhe tradicional që e shtrojnë në sofër sa herë në dyer i trokasin miq të mirë.

Nëse vite më parë këto bjeshkë i shikonin vetëm ata që shtegtonin me bagëtitë, në vite në këto vise tashmë vijnë të gjithë ata që duan alpet shqiptare, dhe kjo festë nuk mund të shërbejë më mirë se sa për të promovuar pasuritë që fal natyra.

Para se gërshërët të vihen mbi leshin e bagëtive, burrat që e kryejnë këtë proces mes lojërave dhe shakave, urojnë edhe për një mot sa më të begatë.

Por festa e Bjeshkëve në Tropojë identifikon dhe një herë se me turizmin, boronicën, dhe shumë të mira të tjera mbështeten ekonomia e pothuajse të gjithë familjeve atje.

Për të fuqizuar më shumë turizmin jo vetëm në verë  por edhe në dimër, Kryetari i bashkisë tregon se investimet në të ardhmen do të jenë në infrastruktura e cila lidhet e mënyrë direkte edhe tek vizitueshmëria.

Ngjyrat e festës, duket se padyshim i japin edhe vajzat e burrat të veshur me kostumet tradicionale, por jo vetëm kaq, edhe lëvizjet e kërcimit të Tropojës. Festa e bjeshkëve, sikurse e do tradita do të vazhdojë të bëhet çdo vit në verë.