Helikopterët nga Holanda dhe Çekia eliminojnë vatrat e zjarrit në Vlorë e Fier

Ndërhyrja nga ajri e helikopterëve të ardhur nga Holanda dhe Çekia kanë dhënë rezultat të menjëhershëm në shuarjen e vatrave të zjarrit në Qarkun e Vlorës.

Me ndihmën e helikopterit “Chinook”, që mund të lëshojnë deri në 10 mijë litra ujë dhe që fluturon në vende të vështira, janë eliminuar vatrat në Dukat dhe Gjirin e Gramës.

Ndërkohë puna për izolimin e plotë të flakëve në të gjithë sipërfaqen e prekur në Gadishullin e Karaburunit.

Gjithashtu është shuar zjarri pranë pikës kufitare Rips në fshatin Livadhja, në bashkinë Finiq, duke shmangur rrezikun për banesat.

Zjarri në fshatin Gjorgos, njësia administrative Cakran, bashkia Fier po mbahet nën kontroll, ndërsa ka vijuar puna me helikopterin çek për shuarjen përfundimtare të tij.

Dy helikopterë Chinooks, së bashku me 47 ushtarakë holandezë si dhe një helikopter çek mbërritën dje në Rinas ndërsa operacionet për shuarjen e zjarreve i kanë nisur mëngjesin e së shtunës.

Në Kepin e Rodonit, në Durrës është raportuar një vatër zjarri, për të cilën po vijon puna për vënien nën kontroll nga forcat në terren. Nuk paraqitet rrezikshmëri.

Një vatër zjarri në një sipërfaqe me shkurre dhe ferra është raportuar në malin e Xhyrës, në bashkinë e Librazhdit. Ai po shuhet nga forcat zjarrfikëse të bashkisë.

Zjarri në fshatin Thirrë, njësia administrative Fan, bashkia Mirditë ka vijuar të zgjerojë perimetrin, duke shkaktuar tym në të gjithë kodrën. Forcat po punojnë për të ndërprerë vijën e zjarrit në afërsi të rrugëve të fshatit. Ndërkaq është izoluar plotësisht zjarri në fshatin Munellë-Domgjon, bashkia Mirditë.

E vështirë paraqitet situata në Majën e Rrunës, në Kukës, ku forcat po punojnë të për mos lejuar përhapjen e flakëve në zonat e banuara. Nën kontroll mbeten flakët në fshatin Klysyrë të bashkisë Tropojë si dhe në Vermosh të Malësisë së Madhe.

LEXONI GJITHASHTU:

• Ndihma e BE për zjarret, mbërrijnë 3 helikopterë nga Holanda e Çekia
• Shënohet viktima e parë nga zjarret, evakuohen 3 fshatra në Gjirokastër
• Ka dyshime më të forta se zjarret janë të qëllimshme, thotë ministri Peleshi