COVID-19 në RMV, nga 16 gushti për të hyrë në hotele dhe kafene duhet certifikata

Rritja e të infektuarve me COVID-19  dhe frika nga varianti ‘Delta’ po detyron edhe autoritetet në Maqedoni të Veriut që të marrin një sërë masash kufizuese.

Ministri i Shëndetësisë Venko Filipçe dhe Komisioni për Sëmundjet Infektive kanë rekomanduar qeverinë që të vendosë masa të reja në rajonin e Tetovës, ku situata epidemiologjike paraqitet më e rëndë.

Masat parashikojnë ndalimin e manifestimeve në ambiente të mbyllura, siç janë dasmat dhe eventet e tjera familjare, objektet e hotelierisë nuk duhet të mbushin më shumë se 30% të kapaciteteve ndërsa tavolinat nuk duhet të kenë më shumë se katër persona.

Nga 16 gushti në të gjithë vendin hyjnë në fuqi masat e reja të cilat fokusohen tek certifikata e COVID- 19.

Në një postim në rrjetin social Facebook, kryeministri Zoran Zaev bëri me dije se hyrja në hotele apo kafene është i ndaluar për personat mbi 18 vjeç që nuk kanë marrë të paktën një dozë vaksine. Certifikatat e imunizimit do të kontrollohen nga shërbimi i sigurisë.

LEXONI GJITHASHTU:

• Protesta kundër certifikatave COVID në Francë e Itali: Po na mohohet liria
• Shqipëria, Kosova dhe RMV me raportin më të lartë të vdekjeve të shtuara gjatë pandemisë