Një muaj karantinë për sportistët australianë pas kthimit nga Lojërat Olimpike

Disa sportistë australianë që morën pjesë në Lojërat Olimpike do të duhet të vihen 4 javë në karantinë pas kthimit në atdhe. Masa është konsideruar si jashtëzakonisht e ashpër nga organizatat sportive.

Atletët që kthehen në Australinë Jugore nga Sidnej (Uellsi i Ri Jugor) po përballen me dyfishin e karantinës së zakonshme që u vendosen udhëtarëve që kthehen.

Komiteti Olimpik i Australisë e kritikoi këtë qasje të autoriteteve lokale duke thënë se ndryshe nga vendet e tjera që u gëzohen kthimit të përfaqësueseve, australianët atje “po i presin me dënime”.

“Ata po dënohen thjesht se përfaqësuan vendin e tyre,” – tha Komiteti.

Gjithsej janë 16 anëtarë të përfaqësueses australiane që janë vendosur tashmë në karantinë 4-javore.

Guvernatori i Australisë së Jugut tha se masat e shtuara kufizuese janë marrë për shkak të rasteve me Delta që kanë nxitur një valë tjetër infektimesh në rajonet e tjera.

Kërkesat e Komitetit Olimpik për lehtësimin e masave ndaj sportistëve janë hedhur poshtë.

Drejtuesi i Komitetit, Matt Carroll e cilësoi absurde pasi shumica e sportistëve, përveçse janë testuar çdo ditë janë edhe të vaksinuar.

Ekspertë thonë se izolimi prej 4 javësh mund të ndikojë ndjeshëm te rendimenti sportiv dhe gjendja psikologjike e sportistëve.

Australia e Jugut, që ka për kryeqytet Adelaiden, ka një popullsi prej 1.7 milionë banorësh.

Prej nisjes së pandemisë atje janë regjistruar diçka më pak se 37 mijë raste me COVID-19, prej së cilave rreth 1 mijë janë mbyllur me pasojë vdekjen.

LEXONI GJITHASHTU:

• Chelsea fiton Super-Kupën e Europës falë portierit Kepa Arrizabalaga
• Phil Foden humb nisjen e sezonit me Manchester City