Rritje e rasteve me COVID në gusht, më shumë të infektuar në krahasim me të njëjtën periudhë të 2020

Të infektuarit me COVID-19 gjatë dy javëve të fundit po shtohen nga dita në ditë. Në 24 orët e fundit janë shënuar 410 raste të reja.

Dy javët e para të këtij muaji kanë shënuar shifra më të larta të të infektuarve, krahasuar me dy javët e para të gushtit të vitit 2020. Nga data 1 gusht deri më 13 gusht në vitin 2020 ka pasur 1695 të infektuar, ndërsa këtë vit 2059 raste.

Por, rritja e infektimeve është pasuar nga rritja e testimeve ditore. Këtë periudhë ka rreth 50 mijë më shumë të testuar se në dy javët e para të gushtit 2020.

Sa i përket viktimave si pasojë e COVID-19, në dy javët e para të gushtit 2020 shifrat rezultojnë të jenë më të larta. Në dy javë ka pasur 56 viktima, ndërsa në dy javët e para të këtij muaji rezultojnë 4 viktima.

Vitin e kaluar në këtë periudhë lëvizja e qytetarëve brenda territorit ishte e lirë. Muzika lejohej deri në orën 8, ndërsa këtë vit deri në orën 23:00.

Vitin e kaluar aktivitetet sportive lejoheshin pa publik, ndërsa këtë vit aktivitetet lejohen me 30% të kapacitetit.

Ndonëse situata me infektimet është më shqetësuese, masat kufizuese këtë muaj nuk kanë ndryshuar, ndryshe nga sa ndodh në Kosovë dhe Maqedoni të Veriut.

LEXONI GJITHASHTU:

• Shtimi i infektimeve të reja rrit numrin e qytetarëve që duan të vaksinohen
• Numër rekord infektimesh me COVID-19 në Shqipëri, humbin jetën dy qytetarë nga Vlora