Ngrihen çadra të ushtrisë pranë aeroportit të Rinasit për kontrollin e afganëve

Nuk ka një orar zyrtar se kur shtetasit afganë mund të mbërrijnë në territorin shqiptar.

Gazetarja e Euronews Albania, Elona Gjylmi raportoi nga aeroporti i Rinasit se autoritetet shqiptare ende nuk japin një numër të saktë të afganëve që do të mbërrijnë sot dhe në ditët në vijim për shkak të zhvillimeve që ndodhin në aeroportin e Kabulit dhe për arsye sigurie.

Ndërkohë, pranë aeroportit janë ngritur disa çadra të ushtrisë, të cilat do të shpërbejnë për të bërë kontrollet e shtetasve afganë, kontrolle fizike dhe shëndetësore.

Në mjediset e aeroportit ndodhet edhe ministrja e Jashtme, Olta Xhaçka, e cila drejton Task-Forcën e ngritur enkas nga qeveria për strehimin e afganëve.

Në këtë aerport puna vijon normalisht dhe nuk ka një shtrim të numrit të punonjësve të policisë edhe pas njoftimit për ardhjen e shtetasve afganë.

Pas mbërritjes, shtetasit afganë do të strehohen në godinat e “Qytetit Studenti”. Gjithashtu, është parashikuar që një pjesë e tyre të strehohen edhe në disa hotele në zonën e Durrësit.

LEXONI GJITHASHTU:

• Rreth 300 afganë pritet të mbërrijnë sot në Shqipëri
• 20 mijë afganë pritet të pranohen nga Britania e Madhe në vitet e ardhshme
• Talebanët: Gati të falim armiqtë, të drejtat e grave sipas ligjit islamik