Vriten të gjithë qentë e një strehe në Australi me justifikim masat anti-COVID

15 qenë, përfshi 10 këlyshë pjesë të një strehe, janë qëlluar për vdekje nga një këshill vendor i një qyteti rural në Australi, sipas interpretimit të tyre të masave anti-COVID.

Këshilli në Bourke Shire i ekzekutoi të gjithë qentë që ndodheshin në këtë strehë, në mënyrë që t’i parandalonin vullnetarët të udhëtonin për t’i marrë ata, me pretendimin se kjo do të rriste mundësitë për përhapjen e virusit.

Zyrtarët tashmë po hetojnë nëse gjatë këtij procesi janë thyer ligjet e mirëqenies së kafshëve.

“Këshilli ynë vendosi të ndërmerrte këtë veprim në mënyrë që të mbronim punonjësit tanë dhe komunitetin tonë, përfshi popullsitë vulnerabël Aborigjene, nga rreziku i shpërndarjes së COVID-19,” u shpreh Zyra e Pushtetit Vendor për agjencinë e lajmeve Sydney Morning Herald.

5 prej qenve ishin strehuar tek kjo jetimore që prej fillimit të gushtit dhe njëri prej tyre sapo kishte lindur 10 këlysh të vegjël.

Një burim është shprehur se vullnetarët e kësaj strehe për kafshët janë tejet të revoltuar pasi ata i kishin ndërmarrë të gjitha masat anti-COVID dhe veprime të tilla ishin tërësisht të panevojshme.

Australia ka parë një rritje në numrin e infeksioneve me COVID-19 kohët e fundit, duke i shtyrë autoritetet të vendosin masa më të rrepta si dhe një mbyllje policore deri në shtator.

Sidoqoftë, stafet e strehëve për kafshët kanë të drejtë të punojnë edhe gjatë orës policore.

LEXONI GJITHASHTU: 

• Çfarë i mungon ligjit të ri për mirëqenien e kafshëve?
• Transporti “kokë poshtë” me helikopterë, vendimtar për të shpëtuar rinocerontët
• “Shkrepni foto, jo armë”, aktivistët bëjnë thirrje për mbrojtjen e botës së egër