7 mijë teste COVID-19 mbërrijnë në Kosovë, priten 10 mijë të tjera

Kosova ka blerë 7 mijë teste COVID-19, dërgesë e cila ka mbërritur sot në Prishtinë. Ndërkohë, qeveria ka nisur procedurat për të blerë dhe 10 mijë teste të tjera. Ministri i Shëndetësisë, Arben Vitia bën të ditur se, “shtatë mijë teste mbërritën sot në Institutin Kombëtar të Shëndetit Publik për RT-PCR.

“Ato do të shërbejnë për të detektuar sëmundjen COVID-19. Ndërkohë, u iniciua kërkesa për furnizmin edhe me dhjetë mijë teste të tjera. Nga Organizata Botërore e Shëndetësisë (OBSH) mbërriti një pjesë e donacionit me material mjekësor mbrojtës kundër COVID-19. Në ditët në vijim mbërrin edhe donacioni nga UNICEF me materiale shtesë”, bën të ditur ministri i Shëndetësisë.

Z. Vitia shton se, “përmes Bankës Botërore kanë përfunduar proceduarat e aktivitetit të prokurimit për material mjekësor mbrojtës. Ndërsa në Ministrinë e Shëndetësisë, është në fazën finale prokurimi për materiale mbrojtëse, pajisje dhe barna”.

Krahas blerjeve nga shtetit, individë dhe biznese brenda dhe jashtë vendit po vazhdojnë të solidarizohen me donacione të shumta si kontribut për të administruar situatën me COVID-19 ndërsa rreth 300 vullnetarë janë regjistruar dhe aktualisht janë në krye të detyrës duke i dalë në ndihmë qytetarëve dhe personelit shëndetësor.